డ్రైవర్ కు గుండెపోటు.. అందరి ప్రాణాలను కాపాడిన కండక్టర్

ఓ ఆర్టీసీ బస్సు నడుపుతున్న డ్రైవర్ కు గుండెపోటు వచ్చింది. అయితే.. గుండెపోటుతో డ్రైవర్ ప్రాణాలు కోల్పోతే కండక్టర్ చాకచక్యంగా వ్యవహరించి ప్రయాణికుల ప్రాణాలను కాపాడాడు. ఈ ఘటన బెంగళూరులోని యశ్వంత్ పూర్ లో చోటు చేసుకుంది. బెంగళూరు మెట్రోపాలిటన్ ట్రాన్స్ పోర్ట్ కార్పొరేషన్ (బీఎంటీసీ) డిపో లో కిరణ్ అనే వ్యక్తి డ్రైవర్ గా పనిచేస్తున్నాడు. బస్సు నేలమంగళ నుంచి యశ్వంత్ పూర్ కు వస్తున్న సమయంలో అకస్మాత్తుగా గుండెపోటుకు గురై డ్రైవింగ్ సీట్లోనే కిరణ్ స్పృహతప్పి పడిపోయాడు. డ్రైవర్ కుప్పకూలడంతో బస్సు అదుపు తప్పి ముందు వెళ్తున్న బస్సును రాసుకుంటూ వెళ్లింది. వెంటనే అప్రమత్తమైన బస్సులోని కండక్టర్ డ్రైవర్ ను లేపే ప్రయత్నం చేస్తూనే డ్రైవింగ్ సీట్లోకి వెళ్లి బస్సును సురక్షితంగా నిలిపివేశాడు. ఆ తర్వాత డ్రైవర్ కిరణ్ ను సమీపంలోని ఆసుపత్రికి తరలించారు. అయితే.. అతడు అప్పటికే మరణించినట్టు వైద్యులు నిర్ధారించారు. బస్సును నిలిపి వేసి ప్రయాణికుల ప్రాణాలు కాపాడిన కండక్టర్ ను ఆర్టీసీ అధికారులు ప్రశంసించారు. ఈ ఘటనకు సంబంధించిన దృశ్యాలు బస్సులోని సీసీటీవీ కెమెరాలో రికార్డయ్యాయి.