సూపర్ మ్యాన్ పుస్తకానికి రూ.81 కోట్లు
ఇంటర్నెట్ డెస్క్ : ఇల్లు అమ్మేద్దామని శుభ్రం చేస్తుండగా దొరికిన అరుదైన సూపర్ మ్యాన్ పుస్తకం ఒక కుటుంబాన్ని కోటీశ్వరులను చేసింది. శాన్ ఫ్రాన్సిస్కోలో ఓ మహిళ ఇటీవల కన్నుమూశారు. ఆమెకు ముగ్గురు కుమారులు. ఇటీవల వారు ముగ్గురూ తల్లి పేరు మీద ఉన్న ఇంటిని అమ్మేయాలని నిర్ణయించుకున్నారు. ఇంట్లోని సామాన్లను తొలగించి శుభ్రం చేస్తుండగా పాతకాలం నాటి సూపర్ మ్యాన్ కామిక్ పుస్తకం దొరికింది.
అప్పట్లో ఈ పుస్తకానికి చాలా క్రేజ్ ఉండేదని తెలుసుకున్న ముగ్గురు సోదరులూ దానిని వేలం వేయాలని భావించారు. ఇందుకోసం టెక్సాస్ లోని ఓ వేలం సంస్థను ఆశ్రయించారు. ఈ నెల మొదట్లో ఈ కామిక్ పుస్తకాన్ని వేలం వేయగా.. ఏకంగా 9.12 మిలియన్ డాలర్లకు అమ్ముడుపోయింది. అంటే దాదాపు రూపాయల్లో సుమారు 81.25 కోట్లు. ఓ కామిక్ పుస్తకానికి ఇంత ధర పలకడం ఇదే మొదటిసారి అని సదరు వేలం నిర్వహించే సంస్థ పేర్కొంది. దీంతో ఆ ముగ్గురు సోదరులు రాత్రికి రాత్రే కోటీశ్వరులయ్యారు.
