రిజిస్ట్రేషన్ శాఖలో విప్లవాత్మక మార్పులు

రాష్ట్రంలో స్టాంప్స్ అండ్ రిజిస్ట్రేషన్ శాఖను పూర్తి పారదర్శకంగా, అవినీతి రహితంగా తీర్చిదిద్దేందుకు ప్రభుత్వం కట్టుబడి ఉందని రెవెన్యూ శాఖ మంత్రి పొంగులేటి శ్రీనివాసరెడ్డి స్పష్టం చేశారు. మేడ్చల్ మల్కాజిగిరి జిల్లా కూకట్‌పల్లి మండలం కైత్లాపూర్‌లో సమీకృత సబ్ రిజిస్ట్రార్ కార్యాలయ భవన నిర్మాణానికి ఆయన సోమవారం శంకుస్థాపన చేశారు. ఈ సందర్భంగా ఆయన మాట్లాడుతూ, ప్రజలు రిజిస్ట్రేషన్ కార్యాలయాల్లో చెట్ల కింద వేచి ఉండే పరిస్థితిని తొలగించి, అత్యాధునిక వసతులతో కూడిన కార్పొరేట్ స్థాయి భవనాలను దశలవారీగా నిర్మిస్తున్నామని తెలిపారు. మొదటి దశలో ఔటర్ రింగ్ రోడ్డు పరిధిలోని 39 కార్యాలయాలను 12 క్లస్టర్లుగా విభజించి సమీకృత భవనాలను నిర్మిస్తున్నట్లు వెల్లడించారు.

రిజిస్ట్రేషన్ శాఖను కేవలం ఆదాయ వనరుగా కాకుండా ఒక సేవా కేంద్రంగా ప్రభుత్వం పరిగణిస్తోందని మంత్రి పేర్కొన్నారు. ప్రభుత్వపై ఆర్థిక భారం పడకుండా బిల్డర్ల భాగస్వామ్యంతో ఈ భవనాలను నిర్మిస్తున్నామని, వచ్చే జూన్ 2 నాటికి గచ్చిబౌలిలోని మోడల్ కార్యాలయంతో పాటు ఇతర భవనాలను అందుబాటులోకి తెస్తామని చెప్పారు. ఈ సమీకృత భవనాల్లో మహిళలు, వృద్ధులు, పసిపిల్లల తల్లులకు అవసరమైన అన్ని రకాల వసతులు ఉంటాయని తెలిపారు. స్లాట్ బుకింగ్ విధానం ద్వారా ఇప్పటికే రిజిస్ట్రేషన్ ప్రక్రియ వేగవంతమైందని, ఒక్కో డాక్యుమెంట్ పూర్తి కావడానికి 20 నిమిషాల లోపే సమయం పడుతోందని ఆయన గుర్తుచేశారు.

అసైన్డ్ భూముల విషయంలో మంత్రి పొంగులేటి కీలక ప్రకటన చేశారు. గతంలో పేదలకు ఇచ్చిన అసైన్డ్ భూములను ప్రభుత్వం ఒకవేళ ప్రజా అవసరాల కోసం తీసుకోవాల్సి వస్తే, వారికి మార్కెట్ విలువ ప్రకారం తగిన పరిహారం మరియు ప్రత్యామ్నాయ స్థలం మంజూరు చేస్తామని హామీ ఇచ్చారు. భూ అక్రమాలపై ఉక్కుపాదం మోపుతామని, పేదల భూములను కాపాడటమే ప్రభుత్వ ప్రాధాన్యత అని స్పష్టం చేశారు. త్వరలో జరగబోయే మేడారం మహా జాతర కోసం ప్రభుత్వం భారీ ఏర్పాట్లు చేసిందని, భక్తులు ఈ ఉత్సవాలకు తరలిరావాలని మంత్రి పిలుపునిచ్చారు. ఈ కార్యక్రమంలో ఎమ్మెల్యేలు, రిజిస్ట్రేషన్ శాఖ ఉన్నతాధికారులు మరియు స్థానిక ప్రజాప్రతినిధులు పాల్గొన్నారు.