భవిష్యత్ తెలంగాణకు బాట వేస్తున్న ఆర్‌అండ్‌బీ
తెలంగాణను 3 ట్రిలియన్ డాలర్ల ఎకానమీగా తీర్చిదిద్దాలన్న లక్ష్యంలో ఆర్‌అండ్‌బీ శాఖ కీలక పాత్ర పోషించాల్సి ఉందని మంత్రి కోమటిరెడ్డి వెంకట్ రెడ్డి అన్నారు . హైదరాబాద్ ఎర్రమంజిల్‌లోని ఆర్‌అండ్‌బీ ప్రధాన కార్యాలయంలో ‘విజన్–2047’ పై మంత్రి కోమటిరెడ్డి వెంకట్ రెడ్డి విస్తృత సమీక్ష నిర్వహించారు. ఈ సందర్భంగా మంత్రి కోమటిరెడ్డి మాట్లాడుతూ, 2047 నాటికి తెలంగాణను 3 ట్రిలియన్ డాలర్ల ఎకానమీగా తీర్చిదిద్దాలన్న లక్ష్యంలో ఆర్‌అండ్‌బీ శాఖ ముఖ్య పాత్ర పోషించాల్సి ఉందన్నారు. రాబోయే 5, 10, 15 ఏళ్ల ట్రాఫిక్ అవసరాలను దృష్టిలో పెట్టుకొని ప్రతి రహదారికి సమగ్రమైన యాక్షన్ ప్లాన్ సిద్ధం చేయాలని శాఖ అధికారులను ఆదేశించినట్లు వెల్లడించారు.
గత రెండేళ్లలో ఆర్‌అండ్‌బీ శాఖలో కోటి చదరపు అడుగులకు పైగా నిర్మాణాలు చేపట్టినట్లు కోమటిరెడ్డి తెలిపారు. హ్యామ్ రోడ్లు, రీజినల్ రింగ్ రోడ్, రేడియల్ రోడ్లు, ఎక్స్‌ప్రెస్‌వేలు, ఎలివేటెడ్ కారిడార్లు, కొత్త ఎయిర్‌పోర్టులు వంటి భారీ మౌలిక సదుపాయ ప్రాజెక్టులు తెలంగాణ అభివృద్ధి దిశను మారుస్తాయన్నారు.
డిసెంబర్ 8, 9 తేదీల్లో జరగనున్న గ్లోబల్ సమ్మిట్ కోసం విజన్ డాక్యుమెంట్‌ను సిద్ధం చేస్తున్నామని, ఇప్పటివరకు చేపట్టిన పనులతో పాటు మన్ననూర్–శ్రీశైలం ఎలివేటెడ్ కారిడార్, భారత్ ఫ్యూచర్ సిటీ–బందరు పోర్టు గ్రీన్‌ఫీల్డ్ హైవే, హైదరాబాద్–విజయవాడ ఎక్స్‌ప్రెస్‌వే వంటి కీలక ప్రాజెక్టులను ప్రపంచానికి వివరించనున్నట్లు తెలిపారు.
