మహిళపై అత్యాచారయత్నం: వీధికుక్క అరుపులకు నిందితుడు పరార్..!
ఇటీవలి కాలంలో వీధికుక్కలు చిన్నపిల్లలపై దాడిచేస్తున్న వార్తలు చదివి చాలా ఆందోళన చెందాం కదా. విశ్వాసానికి మారుపేరైన పెంపుడు కుక్కలు కూడా స్వయంగా యజమానిపై దాడి ఘటనలూ చూశాం. గంజిపోసిన యజమానిపై బోలెడంత విశ్వాసాన్ని ప్రదర్శిస్తాయి. చిన్న పిల్లలంటే ఎక్కువ ప్రేమ కురిపిస్తాయి. అవసరమైతే తమ ప్రాణాలకు తెగించి మరీ మనుషులను కాపాడతాయి. తాజాగా కుక్కల మీద మనుషులకు మరింత విశ్వాసాన్ని పెంచే ఘటన ఒకటి మహారాష్ట్రలోని ముంబైలో చోటు చేసుకుంది. అత్యాచారానికి యత్నించిన వ్యక్తి బారి నుండి 32 ఏళ్ల మహిళను కుక్క చాకచక్యంగా రక్షించిన ఘటన జూన్ 30న ముంబైలో జరిగింది. నడుచుకుంటూ వెళ్తున్న మహిళపై అత్యాచారానికి యత్నించాడు. మహిళ అకౌంటెంట్‌గా ఉద్యోగం చేస్తున్నది. నిర్మానుష్య ప్రదేశానికి తీసికెళ్లి చంపేస్తానని బెదిరించి, నోరుమూసి కింద పడేశాడు. లొంగదీసుకుందామనుకున్న టైములో అక్కడే ఉన్న కుక్క ప్రమాదాన్ని పసిగట్టి గట్టిగా అరవడం మొదలుపెట్టింది. ఆ కుక్క అరుపులకు భయపడిన అతడు, లేచి అక్కడి నుండి పారిపోయాడు. పోతూ పోతూ ఆమె ఐఫోన్‌ను దొంగిలించాడు. అనంతరం ఆమె పోలీసులకు ఫిర్యాదు చేసింది. ఫిర్యాదు మేరకు కేసు నమోదు చేసిన పోలీసులు ఆ ప్రాంతంలోని సీసీటీవీ ఫుటేజీని పరిశీలించి దాని ఆధారంగా నిందితుడిని గుర్తించిన పోలీసులు, అతడిని అరెస్టు చేయడం జరిగింది.
