వరంగల్ కు వరాల జల్లు

అమృత్‌ పథకం కింద వరంగల్‌ జిల్లాకు రూ.874 కోట్లు మంజూరు అయ్యాయని కేంద్ర మంత్రి కిషన్ రెడ్డి తెలిపారు . వరంగల్‌లో కిషన్‌రెడ్డి శనివారం పర్యటించారు. వరంగల్‌ లో విమానాశ్రయం నిర్మాణ పనులను వేగవంతం చేయాలని నిర్ణయించామని ఆయన చెప్పారు . పలు అభివృద్ధి పనుల పురోగతిపై అధికారులతో సమీక్ష నిర్వహించారు. ఈ సందర్భంగా ఆయన మాట్లాడుతూ , ప్రారంభ దశలో ఏటీఆర్‌ విమాన సర్వీసులను నడపాలని భావిస్తున్నామని తెలిపారు. ప్రజల స్పందనను ఆధారంగా తీసుకుని తరువాత మరిన్ని సర్వీసులను ప్రారంభిస్తామని చెప్పారు. కాజీపేట రైల్వే కోచ్‌ ఫ్యాక్టరీ నిర్మాణం వేగంగా సాగుతోందని అన్నారు . కాజీపేట రైల్వే స్టేషన్‌ ఆధునికీకరణ పనులను త్వరితగతిన పూర్తి చేయాలని సూచించామని తెలిపారు. హృదయ్‌ పథకం కింద పురాతన ఆలయాల పునరుద్ధరణకు కేంద్రం నిధులు అందించిందని, రామప్ప ఆలయం అభివృద్ధికి కేంద్ర ప్రభుత్వం రూ.146 కోట్లు ఖర్చు చేస్తోందని కిషన్‌రెడ్డి చెప్పారు.