టీడీపీ నేతల కోసమే మెడికల్ కాలేజీల ప్రైవేటీకరణ

తాడేపల్లి: మెడికల్ కాలేజీలను ప్రైవేటీకరణ పేరుతో, టీడీపీ నేతలకు అప్పగించి వందల కోట్లు లాభాలు అందించే భారీ స్కాం జరుగుతోందని వైసీపీ మాజీ ఎమ్మెల్యే,పల్నాడు జిల్లా వర్కింగ్ ప్రెసిడెంట్ డాక్టర్ గోపిరెడ్డి శ్రీనివాసరెడ్డి తీవ్రంగా ఆరోపించారు. తాడేపల్లిలోని వైసీపీ కేంద్ర కార్యాలయంలో మీడియాతో శనివారం మాట్లాడిన ఆయన, ప్రభుత్వం యాభై ఎకరాల మెడికల్ కాలేజీ భూములను, కేజీ టమోటా ధరకు అమ్మేస్తున్న విధానం ఆశ్చర్యకరమని అన్నారు.మెడికల్ కాలేజీల ప్రైవేటీకరణకు తీసుకున్న నిర్ణయం వెనుక స్పష్టమైన అవినీతి ఉందని, టీడీపీ నేతలకు ఈ కాలేజీలను కట్టబెట్టి వందల కోట్ల రూపాయల లాభం అందించే ప్రయత్నం జరుగుతోందని అన్నారు. మెడికల్ సీట్లను కూడా అమ్ముకునే ప్రణాళికతో చంద్రబాబు ప్రభుత్వం ముందుకు సాగుతోందని, ఈ నేపథ్యంలో కాలేజీలను 66 సంవత్సరాల లీజుకు ఇవ్వడానికి జీవోలు జారీ చేశారని ఆయన వివరించారు.
మెడికల్ కాలేజీలను తరతరాలుగా తమ అనుచరులకకు దోచిపెట్టే ప్లాన్ ఇది అని గోపిరెడ్డి మండిపడ్డారు. జగన్‌మోహన్ రెడ్డి ప్రభుత్వం నిర్మించిన ప్రభుత్వ మెడికల్ కాలేజీలు దేశంలో అత్యుత్తమ మౌలిక వసతులతో ఉండగా, అలాంటి స్థాయి విద్యాసంస్థలను చంద్రబాబు సరళంగా అమ్మేస్తున్నారని విమర్శించారు. “దేశంలో ఎక్కడా ప్రభుత్వ మెడికల్ కాలేజీలను ప్రైవేటీకరించిన ఘటనలు లేవు , కానీ చంద్రబాబే ఎందుకు చేస్తున్నారో అర్ధం కావడం లేదని, ” ఆయన వ్యాఖ్యానించారు.
ప్రైవేటు యాజమాన్యాలకు కాలేజీలను అప్పగించినా కూడా సిబ్బంది జీతాలు ప్రభుత్వమే చెల్లించాల్సి వస్తుందన్న విషయం ప్రజలను మోసం చేసే విధానమని అన్నారు. అత్యవసర సమయంలో పేదవారు ఆస్పత్రికి వచ్చినప్పుడు ‘70 శాతం కోటా ఫుల్ అయింది’ అని చెప్పి తిరస్కరిస్తే ఆ పేద ప్రాణం ఎలా కాపాడతారని గోపిరెడ్డి ప్రశ్నించారు.
వైద్య విద్యపై ప్రభుత్వం సంవత్సరానికి వెయ్యి కోట్లు ఖర్చు పెట్టలేకపోవడం అర్థం కాని విషయమని, ఇప్పటికే చంద్రబాబు వైఖరి వల్ల రాష్ట్రం 2,750 మెడికల్ సీట్లను కోల్పోయిందని, అలాగే పాడేరు మెడికల్ కాలేజీ విషయంలో 50 సీట్లు కోల్పోయిన బాధాకర పరిస్థితి ఏర్పడిందని గోపిరెడ్డి గుర్తుచేశారు. పాడేరు ప్రాంతంలో గర్భిణులు, హాస్టల్ విద్యార్థులు ఎదుర్కొన్న వైద్య సమస్యలు ప్రభుత్వానికి కనబడలేదా అని ప్రశ్నించారు. మెడికల్ కాలేజీల ప్రైవేటీకరణకు వ్యతిరేకంగా వైసీపీ చేపట్టిన కోటి సంతకాల సేకరణ ఉద్యమానికి ప్రజల నుండి భారీ స్పందన వస్తోందని తెలిపారు. తాము అధికారం చేపట్టిన వెంటనే ప్రైవేటీకరించిన మెడికల్ కాలేజీలను తిరిగి ప్రభుత్వాధీనంలోకి తీసుకుంటామని గోపిరెడ్డి శ్రీనివాసరెడ్డి స్పష్టం చేశారు.