తమిళ భాషపై ప్రధాని ప్రశంసలు

ఇంటర్నెట్ డెస్క్ : తమిళనాడులోని కోయంబత్తూరులో ప్రధాని మోదీ తమిళ భాషపై ప్రశంసల వర్షం కురిపించారు. బుధవారం జరిగిన దక్షిణ భారత సేంద్రియ రైతుల సదస్సులో మాట్లాడుతూ తాను చిన్నప్పుడే తమిళం నేర్చుకోవలసిందన్నారు. సదస్సులో రైతు నాయకుడు పీ.ఆర్. పాండియన్ తమిళంలో ప్రసంగించారు. అనంతరం మాట్లాడిన ప్రధాని మోదీ, “పాండియన్ ప్రసంగం తమిళంలో అద్భుతంగా ఉంది. కానీ, అది నాకు పూర్తిగా అర్థం కాలేదు. ఇది చూశాక, చిన్నప్పుడే నేను తమిళం నేర్చుకుని ఉంటే బాగుండేదనిపించింది” అని పేర్కొన్నారు. ప్రధాని వ్యాఖ్యలకు సభకు హాజరైన రైతులు హర్షం వ్యక్తం చేశారు. పాండియన్ ప్రసంగాన్ని తనకు హిందీ లేదా ఇంగ్లీషులోకి అనువదించి ఇవ్వాలని గవర్నర్ ఆర్.ఎన్. రవిని కోరారు. అనంతరం ప్రధాని మోదీ ‘పీఎం కిసాన్ సమ్మాన్ నిధి’ తాజా విడత నిధులను విడుదల చేశారు. “ఈ రోజు, దేశవ్యాప్తంగా రైతుల బ్యాంకు ఖాతాల్లోకి నేరుగా రూ.18,000 కోట్లు జమ చేశాం. ఈ పథకం కింద ఇప్పటివరకు రూ.4 లక్షల కోట్లకు పైగా నేరుగా రైతులకు అందించాం” అని వెల్లడించారు. వస్త్ర పరిశ్రమకు పేరుగాంచిన కోయంబత్తూరు నగరం ఇప్పుడు ప్రకృతి వ్యవసాయంలో నాయకత్వ స్థానంలో నిలవడం గర్వకారణమని ప్రధాని ప్రశంసించారు. అనంతరం, సేంద్రియ వ్యవసాయ ఉత్పత్తుల ప్రదర్శనను సందర్శించి, రైతులతో ముచ్చటించారు.