106 కి.మీ. దూరం.. 6 నిమిషాల్లో ప్రాణాలు కాపాడిన పోలీసులు

డాక్టర్ బి.ఆర్.అంబేద్కర్ కోనసీమ జిల్లాలోని అయినవిల్లి మండలానికి చెందిన యువకుడు ఆర్థిక ఇబ్బందులతో ఆత్మహత్య చేసుకోవాలనుకుని.. ఓ గదిలో ఉరి వేసుకునేందుకు సిద్ధమవుతూ సెల్ఫీ వీడియోను కుటుంబ సభ్యులకు పంపించాడు. అయితే 11.21 గంటలకు పి.గన్నవరం సీఐకు కుటుంబ సభ్యులు సమాచారం అందించడంతో పాటు వీడియోను సైతం షేర్‌ చేశారు. వెంటనే ఐటీ కోర్‌ కానిస్టేబుల్‌ ‌ సహాయంతో లోకేషన్ ​ను కనిపెట్టారు ..కానీ యువకుని ఫోన్‌ స్విచ్చాఫ్‌ వచ్చింది.. దీంతో ఫోన్‌ ఐఎంఈఐ ద్వారా సుమారు 106 కి.మీ. దూరంలో ఉన్న అన్నవరంలో ఉన్నట్టు గుర్తించారు. అన్నవరం ఎస్సై శ్రీహరిబాబుకు సీఐ భీమరాజు ఫోన్ ​లో సమాచారం అందించి వీడియోతో పాటు లోకేషన్‌ను​ షేర్‌ చేసి.. ఫోన్​లో మాట్లాడుతూనే లోకేషన్‌ ట్రేస్‌ చేయాలని సూచించారు. ఇంతలో ఎస్సై సిబ్బందిని అప్రమత్తం చేస్తుండటంతో పాటు వీడియోను స్థానిక లాడ్జిలకు వాట్సాప్‌ గ్రూప్‌లో పోస్ట్‌ చేయడంతో.. దీన్ని చూసిన ఓ లాడ్జి యజమాని ఎస్సైకు సమాచారం ఇచ్చారు. 11.27 గంటలకు హుటాహుటిన లాడ్జికి వెళ్లిన ఎస్సై తలుపులను బద్దలకొట్టి ఉరివేసుకోబొయే యువకుడిని అడ్డుకుని ప్రాణాలను కాపాడారు. దీంతో పోలీసులు ఊపిరి పీల్చుకున్నారు. ఆ యువకుడిని కౌన్సెలింగ్‌ ఇచ్చి కుటుంబ సభ్యులకు అప్పగించారు. పోలీస్ సిబ్బందిని రాష్ట్ర డీజీపీ ద్వారక తిరుమలరావు అభినందించారు.