ప్రధాని మోదీ, పుతిన్ ఒకే కారులో
ఇంటర్నెట్ డెస్క్: 2025లో జరుగుతున్న శాంఘై సహకార సంస్థ (SCO) శిఖరసభ సందర్భంగా అరుదైన దృశ్యం చోటుచేసుకుంది. భారత ప్రధాని నరేంద్ర మోదీ, రష్యా అధ్యక్షుడు వ్లాదిమిర్ పుతిన్ ఒకే కారులో కలిసి ప్రయాణించారు. ఈ సంఘటన రెండు దేశాల మధ్య ఉన్న సాన్నిహిత్యం, వ్యూహాత్మక భాగస్వామ్యాన్ని ప్రతిబింబించిన ఘట్టంగా విశ్లేషకులు పేర్కొంటున్నారు.
పుతిన్ ప్రత్యేకంగా తన అర్మర్డ్ ‘Aurus’ లిమూజిన్‌లో మోదీని ఆహ్వానించగా, ఇద్దరూ స్నేహపూర్వకంగా మాట్లాడుకుంటూ దౌత్య కార్యక్రమాలకు బయలుదేరారు. దీనిపై ప్రధాని మోదీ సోషల్ మీడియాలో స్పందిస్తూ “పుతిన్‌తో జరిపే ప్రతి సంభాషణ విలువైనదే. పరస్పర సహకారం, గ్లోబల్ సవాళ్లను ఎదుర్కోవడంలో రెండు దేశాలు సమన్వయంతో ముందుకు సాగుతున్నాయి” అని అన్నారు. అదే సమయంలో పుతిన్ కూడా “భారత్ ఎప్పుడూ రష్యా నమ్మకమైన మిత్రదేశం” అని పేర్కొన్నారు.
ఈ కారు ప్రయాణం సోషల్ మీడియాలో వైరల్ కావడంతో, అంతర్జాతీయ వర్గాల్లో భారత్-రష్యా సంబంధాలపై మరోసారి చర్చ మొదలైంది. ఈ సంఘటన ద్వైపాక్షిక సంబంధాల్లోని ఆత్మీయతను మాత్రమే కాకుండా, క్లిష్ట అంతర్జాతీయ పరిస్థితుల్లో భారత్-రష్యా వ్యూహాత్మక భాగస్వామ్యం ఎంత బలంగా ఉందో ప్రతిబింబించింది. అమెరికా వాణిజ్య ఒత్తిళ్లు, రష్యా-ఉక్రెయిన్ యుద్ధం వంటి అంశాల నడుమ మోదీ-పుతిన్ అనుబంధం మరింత ప్రాధాన్యం సంతరించుకుంది.
