అవమాన భారంతోనే పీజీ వైద్య విద్యార్థిని ప్రీతి ఆత్మహత్యాయత్నం
పీజీ వైద్య విద్యార్థిని సీనియర్ విద్యార్థి దారుణంగా ర్యాగింగ్ చేశారని చెప్పారు వరంగల్ సీపీ రంగనాథ్. ప్రీతి తెలివైన, విద్యార్థి అని, ఐతే సున్నిత మనస్కురాలన్నారు. కేస్ షీట్ విషయంలో అవమానించేలా మాట్లాడటమే కాకుండా.. 18న వాట్సప్ గ్రూపులో పెట్టిన మేసేజ్పై సైఫ్ను ప్రీతి నిలదీసిందని చెప్పారు. ఏదైనా తప్పు ఉంటే హెచ్ఓడీ దృష్టికి తీసుకెళ్లాలిగానీ.. ఇలా ప్రచారం చేయడం తగదని సైఫ్కు ప్రీతి స్పష్టం చేసింది. తనకు బ్రెయిన్ లేదంటూ సైఫ్ హేళన చేశాడని, స్నేహితులకు చాటింగ్లో ప్రీతి చెప్పింది. వరంగల్లో మొదటి సంవత్సరం పీజీ మెడికల్ విద్యార్థిని ఆత్మహత్యాయత్నానికి పాల్పడిన మరుసటి రోజు, ఆమెను వేధిస్తున్న సీనియర్ని మాటేవాడ పోలీసులు అదుపులోకి తీసుకున్నారు. బాధితురాలు ధరవతి ప్రీతి (26) ప్రస్తుతం హైదరాబాద్లోని నిమ్స్లో చికిత్స పొందుతోంది. పరిస్థితి విషమంగా ఉంది. ఆసుపత్రి సిబ్బంది గదిని పోలీసులు సీల్ చేశారు. సీనియర్ విద్యార్థులు ఆమె భాషపై వ్యాఖ్యానించినట్లు వార్తలు రావడంతో ఇద్దరు విద్యార్థుల మొబైల్ ఫోన్లను కూడా స్వాధీనం చేసుకున్నట్లు వరంగల్ పోలీస్ కమిషనర్ ఏవీ రంగనాథ్ తెలిపారు.
వరంగల్లోని ఎంజిఎం ఆసుపత్రిలో విధులు నిర్వర్తిస్తున్న సమయంలో ప్రీతి తయారు చేసిన కేస్ షీట్లపై వ్యాఖ్యానిస్తూ సైఫ్ విద్యార్థుల వాట్సాప్ గ్రూప్లో కొన్ని సందేశాలను పోస్ట్ చేశాడు. సందేశాలలో ఆమె భాష, రచనా శైలిని విమర్శించాడని సీపీ చెప్పారు. ప్రీతికి ఎక్స్పర్ట్ వైద్యులు చికిత్స చేస్తున్నట్టు నిమ్స్ పేర్కొంది. వరంగల్లో చికిత్స పొందుతున్న ప్రీతికి హైదరాబాద్కు తీసుకొస్తుండగా గుండెపోటు వచ్చిందని ఎంజీఎం ఆస్పత్రి సూపరింటెండెంట్ చంద్రశేఖర్ తెలిపారు. ప్రీతిని మల్టీ ఆర్గాన్ ఫెయిల్యూర్తో బుధవారం ఎంజీఎం ఆస్పత్రి నుంచి నిమ్స్కు తరలించారు. సీనియర్లు ర్యాగింగ్ చేశారని, సరైన దర్యాప్తును డిమాండ్ చేస్తుండగా, మెడికల్ ఎడ్యుకేషన్ డైరెక్టర్ రమేష్ రెడ్డి మధ్యలో డిస్టర్బ్ చేశారన్నారు ప్రీతి తండ్రి.
అయితే విచారణలో నిజం నిగ్గు తేలుతుందన్నారు. ప్రీతి తన సీనియర్ల నిరంతర వేధింపుల కారణంగా ఆత్మహత్యాయత్నానికి పాల్పడ్డారని… అదనపు పని చేయమని ఒత్తిడి చేస్తున్నారని, వాట్సాప్ గ్రూపులలో ఆమె రిపోర్టులను ఎగతాళి చేశారని తండ్రి నరేందర్ చెప్పాడు. వరంగల్లో ఆమెకు సక్రమంగా చికిత్స అందిస్తున్నారని, అయితే ఈ సంఘటన పెద్ద సమస్యగా మారకుండా ఉండేందుకు ప్రభుత్వం ఆమెను హైదరాబాద్కు తరలించిందని కూడా అతను పేర్కొన్నాడు. సైఫ్ సోమవారం రాత్రి ప్రీతితో మాట్లాడిన తర్వాత వరంగల్ ఏసీపీ బొన్నాల కిషన్కు సందేశం పంపినట్లు తెలిపారు. కేసును సమాధి చేసేందుకు కుట్ర జరుగుతోందని తండ్రి నరేందర్ చెప్పాడు. ప్రీతి ఫోన్లో సైఫ్ వేధింపులకు సంబంధించిన ఆధారాలు ఉంటాయని, అయితే అదంతా డిలీట్ అవుతుందేమోనని అనుమానం వ్యక్తం చేశాడు. గొడవలు జరగకుండా ఉండేందుకు ఆమెను హైదరాబాద్కు తరలించారన్నారు. ఘటన దురదృష్టకరమని వైద్యారోగ్య శాఖ మంత్రి హరీశ్రావు అన్నారు. అయితే ఈ వ్యవహారంపై స్వేచ్ఛాయుతమైన విచారణ జరిపి బాధ్యులపై చర్యలు తీసుకుంటామని చెప్పారు. ప్రభుత్వం నుంచి ఆదుకుంటామని హామీ ఇచ్చారు.
తెలంగాణ గవర్నర్ తమిళిసై సౌందరరాజన్ గురువారం నిమ్స్ని సందర్శించి ఆత్మహత్యాయత్నానికి పాల్పడిన పోస్ట్ గ్రాడ్యుయేట్ మెడికల్ విద్యార్థిని ప్రీతి ఆరోగ్య పరిస్థితిని వాకబు చేశారు. పీజీ వైద్య విద్యార్థిని పరిస్థితి విషమించడం బాధాకరమని, ర్యాగింగ్పై ఫిర్యాదు చేశారని, ఇది సున్నితమైన అంశమని, దీనిపై సమగ్ర విచారణ జరిపించాలని సూచించారు. ప్రస్తుతం ఆమె పరిస్థితి క్లిష్టంగా ఉందని… మల్టీ ఆర్గాన్ ఫెయిల్యూర్ స్థితిలో ఉన్న ఆమెను నిమ్స్కు తెచ్చారని వైద్యులు తెలిపారు. ఐతే సైఫ్కు మద్దతుగా ఎంజీఎం వైద్య విద్యార్థులు నిలవడం విశేషం. సైఫ్పై ఎస్సీ, ఎస్టీ కేసు నమోదు చేయడంపై విధులను బహిష్కరించి నిరసన తెలిపారు. ప్రీతి ఆత్మహత్యాయత్నం బాధాకరమన్న జూనియర్ డాక్టర్లు, సైఫ్ను అరెస్టు చేయడం దారుణమన్నారు. మీడియాలో వచ్చిన వార్తల ఆధారంగా నిర్ణయాలు వద్దన్నారు. జూనియర్లను, సీనియర్లు మందలించడం సర్వసాధారణమేనని.. అంత మాత్రాన అరెస్టులు చేస్తారా అంటూ వారు ప్రశ్నిస్తున్నారు.
