పెరూ బంగారు గనిలో ప్రమాదం, 27 మంది సమాధి
దక్షిణ పెరూ మారుమూల ప్రాంతంలోని బంగారు గనిలో జరిగిన అగ్నిప్రమాదంలో కనీసం 27 మంది కార్మికులు మరణించారని అధికారులు తెలిపారు. ఈ ప్రమాదం పెరూ చరిత్రలో అత్యంత ఘోరమైన మైనింగ్ విషాదాలలో ఒకటి. గనిలో తప్పిపోయిన బంధువుల కోసం ఆర్తనాదాలు మిన్నంటాయి. షార్ట్ సర్క్యూట్ వల్ల పేలుడు సంభవించిందని ప్రత్యక్షసాక్ష్యులు తెలిపారు. బంధువుల సమాచారం కోసం కుటుంబ సభ్యులు సమీపంలోని పోలీస్ స్టేషన్‌కు వెళ్లారు.
అరేక్విపా ప్రాంతంలోని లా ఎస్పెరాంజా గనిలోని సొరంగంలో మంటలు చెలరేగడంతో షార్ట్ సర్క్యూట్ కారణంగానే మంటలు చెలరేగినట్లు పోలీసులు మరియు పబ్లిక్ ప్రాసిక్యూటర్ కార్యాలయం ధృవీకరించింది. పబ్లిక్ ప్రాసిక్యూటర్ జియోవన్నీ మాటోస్ ఛానెల్ N టెలివిజన్‌తో మాట్లాడుతూ “గనిలో 27 మంది చనిపోయారు” అని చెప్పారు. ప్రాంతీయ రాజధాని అరేక్విపా నగరం నుండి 10 గంటల ప్రయాణంలో రిమోట్ కాండెసుయోస్ ప్రావిన్స్‌లోని గనిలో పేలుడు సంభవించిన తర్వాత మంటలు ప్రారంభమైనట్లు స్థానిక మీడియా తెలిపింది. పేలుడు ధాటికి యానాక్విహువా పట్టణంలోని గనిలో మంటలు వ్యాపించాయి.
బాధితులు భూమికి 100 మీటర్ల దిగువన ఉన్నారని స్థానిక మీడియా తెలిపింది. బాధితుల మృతదేహాలను బయటకు తీయడానికి ముందు రెస్క్యూ బృందాలు గనిని భద్రంగా ఉంచడానికి ప్రయత్నిస్తున్నాయి. చనిపోయినవారు ఉన్న స్థలాన్ని సురక్షితంగా ఉంచాలని… తద్వారా అందులోకి ప్రవేశించి, మృతదేహాలను స్వాధీనం చేసుకోగలమని భద్రతా సిబ్బంది చెప్పారు. మంటలు చెలరేగిన సమయంలో గనిలో ఎంత మంది ఉన్నారనే దాని గురించి సమాచారం లేదని తెలుస్తోంది. ఎవరూ కూడా ప్రాణాలతో బయటపడినట్లు ఇప్పటి వరకు అధికారులు ధ్రువీకరించలేదు. యానాక్విహువా మేయర్ జేమ్స్ కాస్క్వినో ఆండినా వార్తా సంస్థతో మాట్లాడుతూ, చాలా మంది మైనర్లు ఊపిరాడక మరియు కాలిన గాయాలతో చనిపోయారని చెప్పారు.
లాటిన్ అమెరికాలో అతిపెద్ద బంగారు ఉత్పత్తిదారు పెరూలో ఇటీవలి సంవత్సరాలలో జరిగిన ఘోరమైన మైనింగ్ ప్రమాదాలలో ఈ సంఘటన ఒకటి. మినేరా యానాకిహువా ద్వారా నిర్వహించబడుతున్న ఈ గని చట్టపరమైన సంస్థ అయితే ఈ ప్రాంతంలో చాలా అక్రమ గనులు కూడా ఉన్నాయని తెలుస్తోంది. కంపెనీ 23 ఏళ్లుగా పెరూలో గనులను నిర్వహిస్తోంది.
పెరూ ఆర్థిక వ్యవస్థలో మైనింగ్ కీలకమైనది. GDPలో ఇది ఎనిమిది శాతం కంటే ఎక్కువ. అధికారిక లెక్కల ప్రకారం ప్రపంచంలోనే వెండి, రాగి, జింక్ ఉత్పత్తిలో పెరూ ప్రపంచంలో రెండోది. పెరూలో జింక్, టిన్, సీసం లాటిన్ అమెరికా దేశాల్లోనే అత్యధికంగా లభ్యమవుతుంది. గనులు, ఇంధన మంత్రిత్వ శాఖ ప్రకారం, గత సంవత్సరం, మైనింగ్ సంబంధిత సంఘటనలలో 39 మంది మరణించారు. 2020లో, అరేక్విపాలో గని కూలిపోవడంతో నలుగురు కార్మికులు చిక్కుకుని మరణించారు.