Breaking Newshome page sliderHome Page SliderInternational

బూడిద మేఘాలపై ఆందోళన లేదు

ఇంటర్నెట్ డెస్క్ : ఇథియోపియాలో హెయిలీ గుబ్బీ అగ్నిపర్వతం పేలుడు వల్ల వెలువడిన బూడిద మేఘాలపై వచ్చే వార్తలతో ఆందోళన చెందవద్దని విమాన ప్రయాణికులకు కేంద్ర పౌరవిమానయానశాఖ భరోసా ఇచ్చింది. ఈ బూడిద మేఘాలు భారత్ వైపు కదిలివస్తున్నాయని, దీనితో విమానయాన కార్యకలాపాలు నిలిచిపోతాయని వస్తున్న వార్తల్లో పూర్తిగా నిజం లేదని, ప్రస్తుతం దేశవ్యాప్తంగా విమానాలు బాగానే నడుస్తున్నట్లు పేర్కొంది. ముందు జాగ్రత్తగా కొన్ని విమానాలు దారి మళ్లించామని, దీనిపై ఎయిర్ ట్రాఫిక్ కంట్రోల్, భారత వాతావరణ విభాగం, విమానయాన సంస్థలతో సమన్వయం చేసుకుంటున్నట్లు తెలిపారు.
ఈ అగ్నిపర్వతం పేలుడు వల్ల దట్టమైన పొగను ఆకాశంలోకి కిలోమీటర్ల ఎత్తు వరకు పైకి ఎగసి పడింది. దీని నుంచి వెలువడిన ధూళి, పొగ యెమెన్, ఒమన్, భారత్, ఉత్తర పాకిస్తాన్ వైపు కూడా విస్తరించిందని సమాచారం. ఎర్రసముద్రం మీదుగా ఈ బూడిద మేఘాలు అరేబియా ద్వీపకల్పం నుండి భారత్ వైపు వచ్చాయి. గుజరాత్, ఢిల్లీ, రాజస్థాన్, మహారాష్ట్ర, పంజాబ్, హర్యానా రాష్ట్రాలకు విస్తరించాయి. ఇప్పటికే ఢిల్లీలో కాలుష్యం కారణంగా ఇబ్బంది పడుతున్న ప్రజలు భయాందోళనకు గురవుతున్నారు. ఇవి మంగళవారం రాత్రి భారత్ గగనతలం దాటి చైనా దిశగా ప్రయాణించాయి.