నా భర్త టీం ఇండియా కోచ్: న‌టి తాప్సీ
బాలీవుడ్ న‌టి తాప్సీ ప‌న్ను రీసెంట్‌గా పెళ్లి చేసుకున్న విష‌యం తెలిసిందే. డెన్మార్క్‌కు చెందిన మతియాస్ బో అనే వ్య‌క్తిని తాను పెళ్లి చేసుకుంది. అయితే పెళ్లి అనంత‌రం తన భర్త గురించి కానీ.. తన గురించి కానీ ఎక్క‌డా న్యూస్‌లో రాలేదు. తాప్సీ కూడా అత‌డితో ఉన్న ఫొటోల‌ను పోస్ట్ చేయ‌లేదు.
ఈ భామ ప్ర‌స్తుతం పారిస్ ఒలింపిక్స్‌లో సంద‌డి చేస్తోంది. భార‌త్‌ను ద‌గ్గ‌ర ఉండి ఎంక‌రేజ్ చేస్తోంది. అయితే తన తాజా చిత్రం ఫిర్ ఆయీ హసీన్ దిల్రూబా నెట్‌ఫ్లిక్స్ వేదిక‌గా ఆగ‌ష్టు 9న ప్రేక్ష‌కుల ముందుకు రానుంది. ఈ సినిమా ప్ర‌మోష‌న్స్‌లో భాగంగా తన భర్త గురించి అడుగ‌గా తాప్సీ స‌మాధానమిస్తూ సంచ‌ల‌న వ్యాఖ్య‌లు చేసింది. నా భర్త మథియాస్ బో అంటే తెలియని వాళ్లు ఉన్నారు అంటే కొంచెం బాధగా ఉందని తెలిపింది. అయితే అత‌డు ఒక క్రికెటర్ లేదా పెద్ద వ్యాపారవేత్త కాక‌పోవడం వ‌ల‌న జ‌నాల‌కు తెలుసుకోవాలని అనిపించకపోవ‌చ్చు. కానీ అత‌డు ప్ర‌పంచంలో ఉన్న దిగ్గ‌జ బ్యాడ్మింటన్ ప్లేయ‌ర్‌ల‌లో ఒక‌డు అంతే కాకుండా ప్ర‌స్తుతం ఒలింపిక్స్‌లో టీం ఇండియా బ్యాడ్మింటన్ కోచ్ అంటూ చెప్పుకొచ్చింది.
ఇక తాప్సీ భర్త విష‌యానికి వ‌స్తే.. మథియాస్ బో డెన్మార్క్‌కు చెందిన బ్యాడ్మింటన్ క్రీడాకారుడు. ఇత‌డు 2012 సమ్మర్ ఒలింపిక్స్‌లో ర‌జతం సాధించాడు. అలాగే 2015 యూరోపియన్ గేమ్స్‌లో బంగారు పతక విజేత, 2012, 2017లో రెండుసార్లు యూరోపియన్ ఛాంపియన్‌గా నిలిచాడు.
