మోదీజీ..! మూడేళ్లలో కర్నాటకకు ఏం చేశారో అది చెప్పండి
ఎన్నికలు మీ గురించి కాదు అడిగిన దానికి బదులివ్వండి
ప్రధాని ‘91 సార్లు దుర్వినియోగం’ ఆరోపణలపై రాహుల్ ఫైర్
కర్నాటక పన్ను వాటాలో న్యాయమైన హక్కు పొందిందా?
సమాధానం చెప్పాలంటూ ప్రధానిపై రాహుల్ కౌంటర్
ప్రధాని నరేంద్ర మోదీ, తనను 91 సార్లు దుర్వినియోగం చేశారన్న ఆరోపణలపై కాంగ్రెస్ ముఖ్యనేత రాహుల్ గాంధీ కౌంటర్ ఇచ్చారు. కర్ణాటక ఎన్నికలు తనకు సంబంధించినవి కాదని ప్రధాని నరేంద్ర మోదీ అర్థం చేసుకోవాలని అన్నారు. ప్రధాని మోదీ తన గురించి మాట్లాడే బదులు కర్నాటక కోసం బీజేపీ ప్రభుత్వం చేపడుతున్న కార్యక్రమాలు, భవిష్యత్తు కార్యక్రమాల గురించి మాట్లాడాలని ప్రధానిని డిమాండ్ చేశారు. కాంగ్రెస్ పార్టీ తనను దూషిస్తోందంటూ ప్రధాని మోదీ వ్యాఖ్యలకు రాహుల్ ఘాటు రిప్లై ఇచ్చారు. ‘‘మీరు కర్నాటకలో ఎన్నికల ప్రచారానికి వచ్చారు, కానీ కర్నాటక గురించి మాట్లాడరు. మీ గురించే మాట్లాడతారు. మూడేళ్లుగా కర్నాటకలో ఏం చేశారో మీరే చెప్పాలి. మీ ప్రసంగాల్లో కూడా మాట్లాడాలి. రాబోయే ఐదేళ్లలో మీరు యువత, విద్య, ఆరోగ్యం, అవినీతిపై పోరాడేందుకు ఏం చేస్తారో చెప్పాలి’’ అని రాహుల్ డిమాండ్ చేశారు.
తుమకూరు జిల్లాలో జరిగిన ఒక బహిరంగ సభలో రాహుల్ గాంధీ మాట్లాడుతూ, “ఈ ఎన్నికలు మీ గురించి కాదు, కర్నాటక ప్రజలు, వారి భవిష్యత్తు గురించి, కాంగ్రెస్ మిమ్మల్ని 91 సార్లు దుర్భాషలాడింది, కానీ మీరు కర్నాటక కోసం ఏం చేశారో దాని గురించి ఎప్పుడూ మాట్లాడరు. మీ తదుపరి ప్రసంగం, మీరు ఏం చేసారు, రాబోయే ఐదేళ్లలో మీరు ఏం చేస్తారనే దాని గురించి మాట్లాడాలి.” అంటూ మోదీపై నిప్పులు చెరిగారు రాహుల్ గాంధీ. కాంగ్రెస్ పార్టీ అధ్యక్షుడు మల్లికార్జున్ ఖర్గే మోదీ విషపు పాము అంటూ చేసిన వ్యాఖ్యలపై మోదీ తన దైన స్టైల్లో విమర్శలు గుప్పించారు. కాంగ్రెస్‌ను లక్ష్యంగా చేసుకుని, ఇప్పటి వరకు ఆ పార్టీ నాయకులు తనపై 91 సార్లుగా వివిధ రకాల దూషణలకు పాల్పడ్డారని విమర్శించారు.
తాను కర్నాటకకు వచ్చి ప్రసంగాలు చేసినప్పుడు సిద్ధరామయ్య, డీకే శివకుమార్‌ వంటి పార్టీ నేతల గురించి, వారి పని గురించి మాట్లాడుతానని పేర్కొన్న గాంధీ, “మేము మా నాయకులందరి పేర్లను తీసుకుంటాం. మీరు ఇక్కడకు వచ్చి కూడా ముఖ్యమంత్రి బసవరాజ్ బొమ్మై, బీఎస్ యడ్యూరప్ప, మాజీ ముఖ్యమంత్రి పేర్లను ఎందుకు మాట్లాడరన్నారు. ఎప్పుడూ ప్రసంగాలు అన్నీ మీ గురించేనా అంటూ మండిపడ్డారు. బొమ్మై, యడ్యూరప్ప పేర్లను ఒకటి రెండు సార్లు చెప్పడానికి ప్రయత్నించండి, కనీసం వారు సంతోషంగా ఉంటారన్నారు. ఈ ఎన్నికలు కర్నాటక ప్రజలు, యువత, తల్లులు, సోదరీమణులకు సంబంధించినవి అని రాహుల్ గాంధీ పేర్కొన్నారు. “ఈ ఎన్నికలు ఒక వ్యక్తికి సంబంధించినవి కాదు, నరేంద్ర మోడీకి అసలే సంబంధించినవి కావన్నారు. ప్రధాని దీనిని అర్థం చేసుకోవాలి” అని అన్నారు.
రాహుల్ తన ప్రసంగంలో కాంగ్రెస్ ఎన్నికల ‘గ్యారంటీలు’ హైలైట్ చేశారు – అన్ని గృహాలకు 200 యూనిట్ల ఉచిత విద్యుత్ (గృహ జ్యోతి), ప్రతి కుటుంబానికి చెందిన మహిళకు నెలకు ₹ 2,000 (గృహ లక్ష్మి), ప్రతి సభ్యునికి 10 కిలోల బియ్యం ఉచితంగా. ఒక బిపిఎల్ కుటుంబం (అన్న భాగ్య), గ్రాడ్యుయేట్ యువతకు ప్రతి నెల ₹ 3,000, డిప్లొమా హోల్డర్‌లకు (ఇద్దరూ 18-25 ఏళ్ల మధ్య వయస్సు ఉన్నవారికి) రెండేళ్లపాటు (యువనిధి) ₹ 1,500, మరియు ప్రభుత్వ బస్సుల్లో సఖి పేరుతో మహిళలకు ఉచిత ప్రయాణ సౌకర్యం అందిస్తామన్నారు.
గత మూడేళ్లలో కర్నాటకలో బీజేపీ విపరీతమైన అవినీతికి పాల్పడిందని, ప్రభుత్వం చేసే అన్ని రకాల పనుల్లో 40 శాతం కమీషన్ తీసుకుంటోందని ఆరోపించారు రాహుల్. ప్రజా సంక్షేమం కోసం పనిచేయాల్సిన పాలకులు, ప్రజల జేబులోంచి డబ్బును దోచుకున్నారని అన్నారు. “ఈ అవినీతి, 40 శాతం కమీషన్ గురించి ప్రధానికి తెలియంది కాదు, ఆయనకు అన్నీ తెలుసు.. కాబట్టి గత మూడేళ్లుగా ఈ దోపిడి గురించి ఏమైనా చర్యలు తీసుకున్నారా అని రాహుల్ ప్రశ్నించారు. వాస్తవానికి మీరేం చేయలేదన్నారు.? అందుకు కర్నాటక ప్రజలకు మీరు సమాధానం చెప్పాలి” అని అన్నారు.
కర్నాటకకు కేంద్రం నుంచి రావాల్సిన పన్ను సొమ్ములో సరైన వాటా రావడానికి ఏం చేశారో, వరదల సమయంలో రాష్ట్రానికి ఎలా సాయం చేశారో, కర్నాటక, గోవా, మహారాష్ట్రల మధ్య అంతర్రాష్ట్ర జల వివాదాన్ని ఎలా పరిష్కరించేందుకు ప్రయత్నించారో సమాధానం చెప్పాలని ప్రధానిని కోరారు. “40 శాతం అవినీతికి పాల్పడిన” బీజేపీకి 40 సీట్లు మాత్రమే వస్తాయన్నారు. ప్రజలు కాంగ్రెస్ పార్టీకి 150 సీట్లు ఇవ్వాలని, అప్పుడు బీజేపీ, కాంగ్రెస్ ఎమ్మెల్యేలను కొనుగోలు చేయలేరని, ప్రజాస్వామ్యయుతంగా ఎన్నికైన ప్రభుత్వాన్ని పడగొట్టలేరన్నారు.
