ఈనాడు అధినేత, మీడియా దిగ్గజం రామోజీ రావు కన్నుమూత
ఈనాడు, ఈటీవీ నెట్‌వర్క్, రామోజీ ఫిల్మ్ సిటీ అధినేత రామోజీ రావు (87) ఈరోజు హైదరాబాద్‌లో చికిత్స పొందుతూ మరణించారు. హైబీపీ, ఊపిరి ఆడకపోవటంతో జూన్ 5న హైదరాబాద్‌లోని స్టార్ ఆసుపత్రికి తరలించగా, ఈరోజు తెల్లవారుజామున తుదిశ్వాస విడిచారు. ఆయన పార్థివదేహాన్ని రామోజీ ఫిల్మ్ సిటీలోని ఆయన నివాసానికి తరలించారు. పలువురు ప్రముఖ రాజకీయ నాయకులు, సినీ ప్రముఖులు ఈరోజు తుది నివాళులర్పించేందుకు రానున్నారు.
రామోజీ రావు మరణంతో భారతదేశం మీడియా, వినోద రంగ దిగ్గజాన్ని కోల్పోయిందన్నారు రాష్ట్రపతి ద్రౌపది ముర్ము. పరిశ్రమకు ఆయన చేసిన సేవలు చిరకాలం గుర్తుండిపోతాయన్నారు.
ఆయన మృతి పట్ల ప్రధాని నరేంద్ర మోదీ సంతాపం తెలుపుతూ రామోజీరావు మృతి చాలా బాధాకరమని అన్నారు. “భారతీయ మీడియాలో విప్లవాత్మకమైన విప్లవాన్ని తెచ్చిన దూరదృష్టి గలవాడు. గొప్ప రచనలు, జర్నలిజం, చలనచిత్ర ప్రపంచంపై చెరగని ముద్ర వేసాయి. మీడియా, వినోద ప్రపంచంలో ఆవిష్కరణ, శ్రేష్ఠతకు కొత్త ప్రమాణాలను నెలకొల్పారు” అని ప్రధాని మోదీ అన్నారు. “రామోజీ రావు భారతదేశ అభివృద్ధి పట్ల చాలా మక్కువ కలిగి ఉన్నారు. ఆయనతో మాట్లాడటం వల్ల జ్ఞానం పెంపొందించుకోడానికి అవకాశం కలిగిందని అన్నారు. ఈ కష్ట సమయంలో కుటుంబ సభ్యులకు, స్నేహితులకు, అసంఖ్యాక అభిమానులకు సానుభూతి తెలియజేస్తున్నాను. ఓం శాంతి” అని అన్నారు.
రామోజీ రావు రెండు ఫిల్మ్‌ఫేర్ అవార్డులను గెలుచుకున్నారు. 1936లో జన్మించిన రామోజీ రావు ప్రపంచంలోనే అతిపెద్ద చలనచిత్ర నిర్మాణ సంస్థ అయిన రామోజీ ఫిల్మ్ సిటీని కలిగి ఉన్న రామోజీ గ్రూప్‌కు అధిపతి. ఈనాడు వార్తాపత్రికకు నాయకత్వం వహించాడు. అత్యధికంగా పంపిణీ చేయబడిన తెలుగు భాషా దినపత్రికలలో ఒకటి. 1980వ దశకంలో తెలుగుదేశం పార్టీ (టీడీపీ) ఆవిర్భావానికి ఈనాడు వార్తాపత్రిక గ్రూపు మద్దతుతో ముడిపడి ఉంది. ఆంధ్రప్రదేశ్ మాజీ ముఖ్యమంత్రులు ఎన్‌టి రామారావు, చంద్రబాబు నాయుడు, అనేక ఇతర రాజకీయ, సినీ ప్రముఖులకు సన్నిహితుడు. ఈటీవీ నెట్‌వర్క్‌తో పాటు ఉషాకిరణ్ మూవీస్ అనే నిర్మాణ సంస్థకు నాయకత్వం వహించారు. ఆయనను చెరుకూరి రామోజీ రావు అని కూడా పిలుస్తారు. జాతీయ అవార్డు, రెండు ఫిల్మ్‌ఫేర్ అవార్డులను గెలుచుకున్నారు. దాదాపు 50 సినిమాలు, టెలిఫిల్మ్‌లను నిర్మించారు. 2016లో, జర్నలిజం, సాహిత్యం, విద్యలో చేసిన సేవలకు గానూ, దేశం రెండో అత్యున్నత పౌర పురస్కారమైన పద్మవిభూషణ్‌తో సత్కరించారు.
ఈనాడు గ్రూపు సంస్థల చైర్మన్ శ్రీ రామోజీరావు అస్తమయం తీవ్ర దిగ్భ్రాంతిని కలిగించిందన్నారు టీడీపీ అధినేత నారా చంద్రబాబునాయుడు. సామాన్య కుటుంబంలో పుట్టి అసామాన్య విజయాలు సాధించిన రామోజీరావు మరణం తీవ్ర ఆవేదనకు గురి చేసిందన్నారు. అక్షర యోధుడుగా రామోజీ తెలుగు రాష్ట్రాలకు, దేశానికి ఎన్నో సేవలు అందించారన్నారు. తెలుగు వారి జీవితాల్లో అత్యంత ప్రభావవంతమైన ముద్రవేసిన రామోజీ తెలుగు ప్రజల ఆస్తి అని, ఆయన మరణం తెలుగు ప్రజలకే కాదు….దేశానికి కూడా తీరని లోటన్నారు.
రామోజీరావు మృతిపై వైసీపీ అధినేత జగన్మోహన్ రెడ్డి దిగ్భ్రాంతి వ్యక్తం చేశారు.
రామోజీరావు మృతిపై తెలంగాణ సీఎం రేవంత్ రెడ్డి సైతం ప్రగాఢ సానుభూతి వ్యక్తం చేశారు.
రామోజీరావు మృతిపై బీఆర్ఎస్ అధినేత కేసీఆర్ సంతాపం ప్రకటించారు.
