ఖలిస్థానీ టెర్రరిస్ట్‌ హత్య, కెనడాలో ఇండియా కీలక దౌత్యవేత్త బహిష్కరణ
గత జూన్‌లో ఖలిస్తానీ ఉగ్రవాదిని హతమార్చడంలో భారత ప్రమేయం ఉందని కెనడా సోమవారం ఆరోపించింది. ప్రతీకారంగా ఒట్టావాలోని న్యూఢిల్లీ ఇంటెలిజెన్స్ చీఫ్‌ను బహిష్కరించింది. దౌత్యపరమైన చర్య ఒట్టావా, న్యూఢిల్లీ మధ్య సంబంధాలపై ప్రభావం చూపెడుతోంది. బ్రిటీష్ కొలంబియాలో జూన్‌లో జరిగిన ఖలిస్తానీ ఉగ్రవాది హర్‌దీప్ సింగ్ నిజ్జార్‌ను హతమార్చడంలో భారతీయ ఏజెంట్లకు సంబంధం ఉన్నట్లు తమ ప్రభుత్వం “నమ్మదగిన ఆరోపణలు” కలిగి ఉందని ప్రధాన మంత్రి జస్టిన్ ట్రూడో మధ్యాహ్న సమయంలో పార్లమెంటరీ ప్రతిపక్షాల అత్యవసర సమావేశంలో చెప్పారు. ఈ విషయాన్ని క్లియర్ చేయడంలో సహకరించాల్సిందిగా భారత ప్రభుత్వాన్ని ఆయన కోరారు. ట్రూడో ప్రభుత్వం వెంటనే చర్యలు చేపట్టిందని విదేశాంగ మంత్రి మెలానీ జోలీ తెలిపారు. “ఈ రోజు మేము కెనడా నుండి ఒక సీనియర్ భారతీయ దౌత్యవేత్తను బహిష్కరించాం” అని ఆమె అధికారి పేరు చెప్పకుండా చెప్పారు. బహిష్కరణకు గురైన భారతీయుడు కెనడాలోని భారత విదేశీ గూఢచార సంస్థ అయిన రీసెర్చ్ అండ్ అనాలిసిస్ వింగ్ అధిపతి అని జోలీ తెలిపారు. భారతదేశం వాంటెడ్ టెర్రరిస్ట్‌గా ప్రకటించిన నిజ్జర్‌ను జూన్ 18న ప్రధాన సిక్కు సమాజానికి నిలయంగా ఉన్న వాంకోవర్ శివారు ప్రాంతంలోని సర్రేలో కాల్చి చంపారు. భారత్‌లో ఉగ్రదాడులకు పాల్పడినట్లు ఆరోపణలున్నాయి.
ఖలిస్తానీ మద్దతుదారుల కార్యకలాపాలకు ఒట్టావా కళ్లు మూసుకుపోయిందని ఇండియా గత కొద్ది రోజులుగా ఆరోపిస్తోంది. ట్రూడో మాజీ సలహాదారు, జోసెలిన్ కూలన్, కెనడా ఆరోపణ “ప్రపంచవ్యాప్తంగా తీవ్ర ప్రభావం” కలిగి ఉంటుందని నొక్కిచెప్పారు. 2018లో టర్కీలో జర్నలిస్టు జమాల్ ఖషోగ్గి హత్యను సౌదీ అరేబియా నిర్వహించినట్లు, విదేశాల్లో “రాజకీయ ప్రత్యర్థులను హత్య చేసే దేశాల సమూహం”లో భారతదేశం చేరుతుందని కూలన్ అన్నారు. కెనడా ఆరోపణలపై ఇండియా ఇంకా స్పందించలేదు. ఈ నెల ప్రారంభంలో ట్రూడో హాజరైన న్యూఢిల్లీలో జరిగిన G20 సదస్సు సందర్భంగా ఇరు దేశాల మధ్య ఉద్రిక్తతలు మరింతగా చెలరేగాయి. ప్రభుత్వ ప్రకటన ప్రకారం, ట్రూడోతో జరిగిన సమావేశంలో ప్రధానమంత్రి నరేంద్ర మోదీ… కెనడాలో తీవ్రవాద మూలాలు, భారత వ్యతిరేక కార్యకలాపాలను కొనసాగించడం పట్ల తీవ్ర ఆందోళన వ్యక్తం చేశారు. కెనడా ఇటీవల భారత్‌తో స్వేచ్ఛా వాణిజ్య ఒప్పందం కోసం చర్చలను నిలిపివేసింది. ద్వేషానికి వ్యతిరేకంగా ప్రవర్తిస్తూనే, కెనడా భావవ్యక్తీకరణ స్వేచ్ఛ, మనస్సాక్షి మేరకు వ్యవహరించడం, శాంతియుత నిరసన స్వేచ్ఛను ఎల్లప్పుడూ కాపాడుతుందని ట్రూడో మీడియాతో అన్నారు.
