కేసీఆర్ దీక్షే తెలంగాణ ఉద్యమానికి ఊపిరి

ప్రత్యేక రాష్ట్రం రాదు అది అసాధ్యమన్న వారి నోర్లు మూయించి తెలంగాణ రాష్ట్రాన్ని తీసుకొచ్చిన వ్యక్తి కేసీఆర్ అని మాజీ మంత్రి హరీశ్ రావు అన్నారు . సబ్బండ వర్గాలను ఏకం చేసి అసాధ్యాన్ని సుసాధ్యం చేసిన ఘన చరిత్ర కేసీఆర్‌దేనని హరీశ్ రావు పేర్కొన్నారు. ‘దీక్షా దివస్’ సందర్భంగా ఎక్స్‌ వేదికగా ఆయన ట్విట్ చేశారు . 2009 నవంబర్ 29న కేసీఆర్ ప్రారంభించిన ఆమరణ నిరాహార దీక్షే తెలంగాణ ఉద్యమానికి కొత్త దిశనిచ్చిందని అన్నారు. ‘తెలంగాణ వచ్చుడో… కేసీఆర్ సచ్చుడో’ అన్న నినాదంతో ఆ దీక్ష ప్రజల హృదయాల్లో జ్వాలలు రగిలించిందని, అదే తెలంగాణ రాష్ట్ర ఏర్పాటుకు బాటలు వేసిందని హరీశ్ గుర్తుచేశారు. నాలుగు కోట్ల ప్రజల ఆకాంక్ష కోసం అలుపెరగని పోరాటం చేసిన చరిత్ర కేసీఆర్‌దేనని పేర్కొన్నారు.

పదవులకంటే ప్రజల కోసం ప్రాణాలు అర్పించేందుకు సిద్ధమయ్యే ధైర్యం కేసీఆర్‌కే ప్రత్యేకమని హరీశ్ వివరించారు. తెలంగాణ అజరామర చరిత్రలో వీరోచిత ముద్ర కేసీఆర్ పేరేనని, ‘జై తెలంగాణ’ అన్న రణనాదం ఆయనకే ప్రతీకగా నిలిచిందని అన్నారు. నవంబర్ 29న కేసీఆర్ దీక్ష లేకపోతే డిసెంబర్ 9 ప్రకటన వెలువడేదీ కాదని, ఆ ప్రకటనే లేకుండా తెలంగాణ రాష్ట్రం ఆవిర్భవించేదీ కాదని స్పష్టం చేశారు. దశాబ్దాల సుదీర్ఘ పోరాటంతోనే తెలంగాణ సిద్ధించిందని, పాలకుల దయాదాక్షిణ్యంతో రాష్ట్రం రాలేదని వ్యాఖ్యానించారు. తెలంగాణ రాష్ట్ర ఏర్పాటుకు కారణమైన దీక్షా రోజులు, ఉద్యమ జ్ఞాపకాలు తన హృదయంలో ఎప్పటికీ నిలిచిపోతాయని, అవే తెలంగాణ స్ఫూర్తిని నిత్యం రగిలిస్తుంటాయని హరీశ్ రావు ట్వీట్‌లో పేర్కొన్నారు.