కాళోజీ యూనివర్సిటీ అవినీతి పై నిగ్గుతేల్చాలి

కాళోజీ నారాయణరావు ఆరోగ్య విశ్వవిద్యాలయాన్ని కేంద్రంగా చేసుకుని జరుగుతున్న అవినీతి, అక్రమాలపై వెంటనే చర్యలు తీసుకోవాలని మాజీ మంత్రి హరీశ్ రావు రాష్ట్ర గవర్నర్ జిష్ణుదేవ్ వర్మకు గురువారం లేఖ రాశారు. ప్రతిష్ఠాత్మకమైన ఈ విశ్వవిద్యాలయం కాంగ్రెస్ పాలనలో అవినీతి, వివాదాలకు కేంద్రబిందువుగా మారడం అత్యంత శోచనీయమని పేర్కొన్నారు.
ఇటీవలి కాలంలో జరుగుతున్న పరిణామాలు వైద్య విద్యార్థులు, తల్లిదండ్రులతో పాటు సమాజంలోని అన్ని వర్గాల్లో తీవ్ర ఆందోళన రేకెత్తిస్తున్నాయని హరీశ్ రావు లేఖలో పేర్కొన్నారు. మార్పు తెస్తామంటూ అధికారంలోకి వచ్చిన రేవంత్ రెడ్డి ప్రభుత్వం కేవలం రెండు ఏళ్ల వ్యవధిలోనే స్కాంలకు నిలయంగా మారిందని తీవ్ర విమర్శలు చేశారు.
విద్యా సంస్థలు సైతం అవినీతి ముసుగులో దిగజారడం రాష్ట్ర ప్రభుత్వ పనితీరు ఎంత దారుణంగా ఉందొ నిరూపిస్తున్నదని వ్యాఖ్యానించారు. మహాకవి శ్రీశ్రీ చెప్పిన “కాదేదీ కవితకు అనర్హం” అన్న పలుకులను ఉటంకిస్తూ, రేవంత్ రెడ్డి పాలనలో “కాదేదీ స్కాంకు అనర్హం” అన్న పరిస్థితి ఏర్పడిందని హరీశ్ ఎద్దేవా చేశారు.
వైద్య విద్య మార్కుల రీ–వాల్యుయేషన్ ప్రక్రియపై తీవ్ర ఆరోపణలు వెల్లువెత్తుతున్నప్పటికీ, ప్రభుత్వం ఎందుకు మౌనం వహిస్తోందని ప్రశ్నించారు. పీజీ పరీక్షల్లో ఫెయిల్ అయిన ఐదుగురు విద్యార్థులు కొద్ది రోజుల్లోనే పాస్ కావడం అనుమానాస్పదమని పేర్కొన్నారు. ఈ అక్రమాల వెనుక వీసీ డాక్టర్ నందకుమార్ రెడ్డి పాత్రపై బలమైన ఆరోపణలు వినిపిస్తున్నప్పటికీ, కాంగ్రెస్ ప్రభుత్వం చర్యలు తీసుకోకపోవడం సందేహాలకు తావిస్తున్నదని అన్నారు.
ఫెయిల్ అయిన విద్యార్థులంతా ప్రైవేట్ మెడికల్ కాలేజీలకు చెందినవారే కావడం, వీసీ ఆ కాలేజీలతో ఎంత మొత్తంలో డీల్ చేసుకున్నారనే ప్రశ్నలు కూడా లేవనెత్తుతున్నారు. రీ–కౌంటింగ్ తర్వాత ఓ విద్యార్థి పాస్ కావడం కాళోజీ యూనివర్సిటీ చరిత్రలోనే మొదటిసారి జరగడం, నిబంధనల స్పష్టమైన ఉల్లంఘన అని హరీష్ రావు అన్నారు. విద్యార్థులకు సమాధానపత్రాలు ఇచ్చి, మళ్లీ సమాధానాలు రాయించి, తిరిగి మూల్యాంకనం చేయించినట్లు విజిలెన్స్ విచారణలో ఒక విద్యార్థి వెల్లడించిన విషయాన్ని గుర్తుచేశారు. వీసీ ఇలాంటి అక్రమాలకు పాల్పడడం వైద్య విద్యా వ్యవస్థ మొత్తానికి మాయని మచ్చ అని పేర్కొన్నారు. పీజీ పరీక్షలను సక్రమంగా నిర్వహించడంలో వీసీ ఘోర వైఫల్యం చెందారని హరీష్ రావు అన్నారు. సమర్థులైన అధికారులను పక్కనపెట్టి రాజకీయ అవసరాలకు అనుగుణంగా వ్యవహరించడం వలన యూనివర్సిటీ ప్రతిష్ఠ దెబ్బతిందని విమర్శించారు. ఈ వ్యవహారంలో భారీ స్థాయిలో డబ్బు చేతులు మారినట్లు స్పష్టమవుతున్నదని పేర్కొన్నారు. ఎంబీబీఎస్ పరీక్షలలోనూ అక్రమాలు, మాన్యువల్ మార్కుల సవరణలు, సర్వర్ మార్పులు జరిగినట్లు ఆరోపణలు ఉన్నాయని హరీష్ రావు లేఖలో వెల్లడించారు. విద్యార్థులు ఫోరెన్సిక్ ఆడిట్ డిమాండ్ చేస్తున్నప్పటికీ ప్రభుత్వం ఎందుకు నిరాకరిస్తోంది? స్కాంలు బయటపడతాయనే భయమా? అని ప్రశ్నించారు.
అర్హతలేని విద్యార్థులను అడ్డదారిలో పాస్ చేస్తే ప్రజల ప్రాణాలకు ముప్పు వాటిల్లుతుందని, దానికి బాధ్యత ఎవరిదో ప్రభుత్వం స్పష్టం చేయాలని డిమాండ్ చేశారు. ఫేక్ ఇన్‌స్పెక్షన్లు, నర్సింగ్ మరియు మెడికల్ కాలేజీల నుండి భారీ మొత్తాల వసూళ్లపై వచ్చిన ఆరోపణలను పరిగణలోకి తీసుకోకుండా ప్రభుత్వం ఎందుకు చర్యలు తీసుకోలేదని మండిపడ్డారు.
తక్షణమే వీసీ నందకుమార్ రెడ్డిని విధుల నుంచి తొలగించాలని, విశ్వవిద్యాలయ అవినీతి, అక్రమాలపై పూర్తి స్థాయి విచారణ జరపాలని గవర్నర్‌ను హరీష్ రావు కోరారు. ఆరోగ్యశాఖ, విజిలెన్స్ దర్యాప్తు నివేదికలను బహిర్గతం చేయాలని, ఎంబీబీఎస్, పీజీ పరీక్షల అక్రమాలపై ఫోరెన్సిక్ ఆడిట్ నిర్వహించాలని డిమాండ్ చేశారు. భవిష్యత్తులో ఇలాంటి ఘటనలు పునరావృతం కాకుండా పరీక్షా వ్యవస్థను పకడ్బందీగా మార్చాలని సూచించారు