నా పదవీకాలం పూర్తయిన తర్వాతే బయటపడింది

విజయవాడ: తిరుమల తిరుపతి దేవస్థానం (టీటీడీ) పరకామణి కేసులో దర్యాప్తు వేగం పెరిగింది. ఈ నేపథ్యంలో టీటీడీ మాజీ ఛైర్మన్ వైవీ సుబ్బారెడ్డి విజయవాడలోని సీఐడీ కార్యాలయంలో శుక్రవారం విచారణకు హాజరయ్యారు. పరకామణి వ్యవహారంపై సీఐడీ అడిగిన అన్ని ప్రశ్నలకు సమాధానాలు ఇచ్చానని చెప్పారు. “నా హయాంలో దొంగతనం జరిగిందా అని అధికారులు అడిగారు. కానీ ఆ విషయం నా పదవీకాలం పూర్తయిన తర్వాతే బయటపడింది. అప్పట్లో ఎవరు ఈ విషయం దాచారో నాకు తెలియదు అని చెప్పాను” అని విచారణ తర్వాత సుబ్బారెడ్డి మీడియాకు వెల్లడించారు .అడిషనల్ డీజీ రవిశంకర్ అయ్యన్నార్ సారథ్యంలోని బృందం ఆయనను సుమారు రెండు గంటల పాటు ప్రశ్నించి కీలక వివరాలను సేకరించింది. సుబ్బారెడ్డి స్టేట్‌మెంట్‌ను కూడా అధికారులు అధికారికంగా రికార్డు చేశారు.
డిసెంబర్ 2 నాటికి ఈ కేసు పురోగతిపై హైకోర్టుకు నివేదిక సమర్పించాల్సి ఉండటంతో సీఐడీ దర్యాప్తును ముమ్మరం చేసినట్లు తెలుస్తోంది. రెండు రోజుల క్రితం టీటీడీ మాజీ ఈవో ధర్మారెడ్డి, సీఎస్‌వో నరసింహ కిశోర్‌లను కూడా విచారించారు. తాజాగా తిరుపతి ఎస్పీ కార్యాలయం నుంచి కేసుకు సంబంధించిన పత్రాలను సీఐడీ ఆఫీసుకు తరలించడం కూడా ఈ కేసులో మరో ముఖ్య ముందడుగు.ఈ విచారణను రాజకీయ కోణంలో చూడకూడదని సుబ్బారెడ్డి విజ్ఞప్తి చేశారు. నిజానిజాలు వెలుగులోకి వచ్చేలా నిష్పక్షపాత దర్యాప్తు చేసి అసలైన దోషులను కఠినంగా శిక్షించాలని కోరారు. దర్యాప్తుకు తాను పూర్తి సహకారం అందిస్తానని అధికారులకు హామీ ఇచ్చినట్లు తెలిపారు.