తారక్‌ దేవర లొకేషన్‌ స్టిల్‌తో జాన్వీకపూర్‌ ఆసక్తికర పోస్ట్‌
జూనియర్‌ ఎన్టీఆర్ టైటిల్‌ రోల్‌లో నటిస్తోన్న దేవర చిత్రానికి కొరటాల శివ దర్శకత్వం వహిస్తున్నారు. షూటింగ్ దశలో ఉన్న ఈ సినిమా గురించి ఏదో ఒక అప్‌డేట్ ఇస్తూ అభిమానుల్లో జోష్‌ నింపుతున్న కొరటాల టీం. మూవీ లవర్స్‌ ఆసక్తిగా ఎదురుచూస్తున్న టాలీవుడ్ పాన్ ఇండియా ప్రాజెక్టుల్లో ఒకటి దేవర. దేవర రెండు పార్టులుగా రాబోతుండగా.. పార్టు 1 సెప్టెంబర్‌ 27న గ్రాండ్‌గా విడుదల కానుంది. జాన్వీకపూర్‌ దేవర షూటింగ్ టైంను ఫుల్‌ ఎంజాయ్‌ చేస్తోంది. తన అభిమానులు, ఫాలోవర్ల కోసం ఇన్‌స్టాగ్రామ్‌లో ఓ ఆసక్తికర విషయాన్ని షేర్ చేసింది. దేవర షూటింగ్ బ్రేక్‌ సమయంలో పసందైన విందు భోజనం ఫొటోను అందరితో పంచుకుంది. డైనింగ్ టేబుల్‌పై బిర్యానీ, చికెన్‌, డిషెస్‌తోపాటు పలు శాఖాహార వంటకాలున్న స్టిల్‌ షేర్ చేస్తూ.. దేవర షూటింగ్‌ను ఇందుకే ప్రేమిస్తున్నానంటూ ఫైర్‌, లవ్‌ ఎమోజీలను క్యాప్షన్‌గా పెట్టింది. ఈ ఫొటో నెట్టింట వైరల్ అవుతోంది.
తాజా సమాచారం ప్రకారం శంషాబాద్‌లో వేసిన స్పెషల్‌ సెట్‌లో జాన్వీకపూర్‌, తారక్‌, ఇతర ఆర్టిస్టులపై వచ్చే భారీ సాంగ్‌ను చిత్రీకరిస్తోంది కొరటాల శివ అండ్‌ టీం. దేవర షూటింగ్‌ను జెట్‌ స్పీడ్‌లో పూర్తిచేసి అనుకున్న సమయానికి విడుదల చేసేందుకు కొరటాల టీం ప్లాన్ చేస్తున్నట్టు సమాచారం. దేవర నుంచి అనిరుధ్‌ రవిచందర్‌ కంపోజిషన్‌లో విడుదలైన ఫియర్ సాంగ్‌తోపాటు గ్లింప్స్‌ నెట్టింటిని షేక్ చేస్తూ.. మిలియన్లకు పైగా వ్యూస్‌తో సోషల్ మీడియాను షేక్ చేస్తున్నాయి.
ఈ మూవీలో బాలీవుడ్ యాక్టర్‌ సైఫ్‌ అలీఖాన్‌ నటిస్తుండగా.. ప్రకాశ్ రాజ్‌, షైన్ టామ్ ఛాకో, శ్రీకాంత్‌, మురళీ శర్మ, హిమజ ఇతర కీలక పాత్రల్లో నటిస్తున్నారు. సుధాకర్‌ మిక్కిలినేని, కొనరాజు హరికృష్ణ, కల్యాణ్ రామ్‌ సంయుక్తంగా తెరకెక్కిస్తున్నారు.
