రౌడీయిజం, అరాచకాలు చేస్తే చూస్తూ ఊరుకోను

పల్నాడు జిల్లా మాచర్లలో శనివారం జరిగిన ప్రజావేదిక బహిరంగ సభలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఘాటైన వ్యాఖ్యలు చేశారు. ‘‘రౌడీయిజం, అరాచకాలు చేస్తే చూస్తూ ఊరుకోను. మాచర్లలో ఒకప్పుడు ప్రజాస్వామ్యం లేకుండా ముఠాలు ఆధిపత్యం చెలాయించాయి. కానీ ఇప్పుడు ఎవరికైనా స్వేచ్ఛగా రావడానికి అనుకూల వాతావరణం ఉంది’’ అని అన్నారు.

‘‘రాయలసీమలో ముఠాలను అరికట్టాం. పల్నాడులోనూ ప్రజలపై దాడులు చేయొద్దని హెచ్చరిస్తున్నా. ప్రజల ఆస్తులకు రక్షణగా నిలబడతాం. ఎవరి ప్రవర్తన బాగాలేకపోయినా ప్రజలు క్షమించరు’’ అని చంద్రబాబు స్పష్టం చేశారు.

‘‘ఒకేసారి రూ.12 వేల కోట్లు నేరుగా ప్రజలకు అందజేశాం. ఆడబిడ్డలకు ఉచిత బస్సు ప్రయాణం కల్పించాం. ప్రతి విద్యార్థికి ‘తల్లికి వందనం’ అందజేస్తున్నాం. అన్నదాత సుఖీభవతో రైతులను ఆదుకుంటున్నాం. పింఛన్ల రూపంలో ఏడాదికి రూ.34 వేల కోట్లు ఇస్తున్నాం. ఏడాదిలో 16 వేలమందికి డీఎస్సీ ద్వారా ఉద్యోగాలు ఇచ్చాం. మున్ముందు 10 లక్షల ఉద్యోగాలు ఇస్తాం’’ అన్నారు.

గత వైసీపీ ప్రభుత్వంపై విమర్శలు చేస్తూ, ‘‘85 లక్షల మెట్రిక్ టన్నుల చెత్తను రోడ్లపై వేసారు. మేం అధికారంలోకి రాగానే చెత్త పన్ను రద్దు చేశాం. అక్టోబర్ 2నాటికి లెగసీ వేస్ట్ పూర్తిగా తొలగిస్తాం. స్వచ్ఛ వాహనాలు ప్రజల ఇంటికే వస్తాయి. ప్లాస్టిక్ వాడకం ఆపి రాష్ట్రాన్ని ‘ప్లాస్టిక్ ఫ్రీ’గా మారుస్తాం’’ అన్నారు.

‘‘వాట్సప్ గవర్నెన్స్ ద్వారా ఇప్పటికే 730 సేవలు అందుబాటులో ఉన్నాయి. త్వరలో ‘సంజీవని’ కార్యక్రమం తీసుకొస్తాం. అందరికీ రూ.2.5 లక్షల బీమా, పేదలకు రూ.25 లక్షల ఆరోగ్య బీమా అందిస్తాం. ఇంటి వద్దే వైద్య సదుపాయం కల్పిస్తాం. బిల్ గేట్స్ సాంకేతిక సాయం అందించడానికి అంగీకరించారు’’ అని చెప్పారు.

‘‘2027 కల్లా పోలవరం పూర్తిచేసి జాతికి అంకితం చేస్తాం. నదుల అనుసంధానం ద్వారా రాష్ట్రంలోని ప్రతి ఇంటికి సాగు, తాగునీరు అందేలా చేస్తాం. ఈ ఏడాది 94% ప్రాజెక్టుల్లో జలకళ కనిపిస్తోంది. మిర్చి బోర్డు ఏర్పాటు కోసం కేంద్రంతో చర్చిస్తాను’’ అని చంద్రబాబు తెలిపారు.

మాచర్లలో తాగునీటి సమస్య పరిష్కారం, వ్యవసాయంలో పురుగు మందుల వాడకాన్ని తగ్గించడం, జిల్లా కేంద్రంలో వంద పడకల ఆసుపత్రి మంజూరు, ఇతర నియోజకవర్గాల్లోనూ ఆసుపత్రుల ఏర్పాటు ప్రాధాన్యంగా ఉంటుందని ఆయన ప్రకటించారు. పల్నాడు ఉత్సవాలను ఘనంగా నిర్వహిస్తామని కూడా హామీ ఇచ్చారు.
మాచర్ల సభలో సీఎం చేసిన ఈ వ్యాఖ్యలు స్థానిక ప్రజల్లో ఉత్సాహాన్ని రేకెత్తించగా, రాజకీయ వర్గాల్లో చర్చనీయాంశంగా మారాయి.