భారీ హిమపాతం..జమ్మూ కశ్మీర్‌కు కనెక్షన్స్ బంద్..
భారీగా కురుస్తున్న హిమపాతం కాశ్మీరు లోయను వణికిస్తోంది. దీనితో ఇతర ప్రాంతాలతో అన్నిరకాల రవాణాలు రద్దు అయ్యాయి. రోడ్డు, రైల్వే సహా, విమాన ప్రయాణాలు కూడా నిలిచిపోయాయి. కశ్మీర్ ముఖ్యమంత్రి ఒమర్ అబ్దుల్లా ఈ విషయంపై సోషల్ మీడియా వేదికగా స్పందించారు. జమ్మూ నుండి శ్రీనగర్‌కు తాను వెళ్లానని, బనిహాల్ నుండి శ్రీనగర్ వరకూ మంచు ఎడతెరిపి లేకుండా కురుస్తోందని, ఖాజిగుండ్ వద్ద 2 వేల వాహనాలు మంచులో కూరుకుపోయాయని పేర్కొన్నారు. కశ్మీర్ విశ్వవిద్యాలయం పరిధిలో శనివారం జరగాల్సిన అన్ని పరీక్షలు వాయిదా వేశారు. శ్రీనగర్-జమ్మూ జాతీయ రహదారి, మొఘల్ రోడ్డులు మూసివేశారు. శ్రీనగర్ విమానాశ్రయం నుండి అన్ని రకాల విమాన సర్వీసులు నిలిచిపోయాయి. రైల్వే ట్రాక్‌లపై భారీగా మంచు పేరుకుపోవడంతో బనిహాల్-బారాముల్లాల మధ్య పలు రైళ్లు రద్దు చేశారు.
