ముంబయి విమానాశ్రయంలో భారీగా బంగారం పట్టివేత

ముంబయి అంతర్జాతీయ విమానాశ్రయంలో జరిగిన తనిఖీలలో భారీగా బంగారం పట్టుబడింది. నైరోబీకి చెందిన ఇద్దరు మహిళల వద్ద 33 కేజీల బంగారు కడ్డీలు లభ్యమయ్యాయి. వీటి విలువ ఏకంగా రూ.19 కోట్లు ఉంటుందని అంచనా. ఈ ఇద్దరిలో ఒక మహిళ గర్భవతి కూడా కావడం విశేషం. ఆమె విమానం దిగి గ్రీన్ ఛానెల్ ద్వారా బయటకు వెళ్తుండగా అనుమతి లేని వస్తువుల గురించి ప్రశ్నించిన అధికారులకు జవాబు చెప్పకపోవడంతో అనుమానం వచ్చి తనిఖీలు చేయగా లో దుస్తులలో 8 బంగారు కడ్డీలు, హ్యాండ్‌బాగ్‌లో టేప్‌తో చుట్టిన 20 బంగారు కడ్డీలు గుర్తించారు. అలాగే, మరో మహిళ వద్ద 61 బంగారు కడ్డీలు గుర్తించారు. ఆమె వద్ద 21 కిలోల పైగా బంగారం స్వాధీనం చేసుకున్నారు.