గురుకుల నిధులపై హరీశ్‌రావు ప్రశ్నలు
తెలంగాణ మాజీ మంత్రి తన్నీరు హరీశ్‌రావు సీఎం రేవంత్‌రెడ్డిపై తీవ్ర విమర్శలు చేశారు. గురుకులాల కోసం గ్రీన్ ఛానెల్‌లో నిధులు విడుదల చేస్తామని ముఖ్యమంత్రి చేసిన హామీ “నీటి మూటలేనా?” అని హరీశ్‌రావు ప్రశ్నించారు.
తన X (ట్విట్టర్) ఖాతాలో పోస్ట్ చేసిన హరీశ్‌రావు, “కమీషన్లు వస్తేనే నిధులు కేటాయిస్తారా? లేక విద్యార్థుల అభివృద్ధి ముఖ్యం కాదా?” అంటూ ప్రభుత్వంపై కఠిన వ్యాఖ్యలు చేశారు.
అలాగే, “హామీలతో ప్రజలను మభ్యపెట్టడం, ఆ తర్వాత మాట మార్చడమే రేవంత్ అనుసరిస్తున్న కొత్త రాజకీయ సిద్ధాంతమా?” అని నిలదీశారు. ఆయన వ్యాఖ్యలు రాష్ట్ర రాజకీయాల్లో మరోసారి చర్చనీయాంశంగా మారాయి.
విద్యా రంగానికి సంబంధించిన నిధుల విడుదలలో జాప్యం జరుగుతోందని ఇటీవల పలు సంఘాలు కూడా ప్రభుత్వంపై విమర్శలు గుప్పించాయి. హరీశ్‌రావు ఈ వ్యాఖ్యలతో ఆ విమర్శలకు మరింత బలం చేకూరినట్లు కనిపిస్తోంది.
