ముగిసిన మొదటి దశ నామినేషన్ల స్వీకరణ

తెలంగాణ లో పంచాయతీ ఎన్నికల మొదటి దశ నామినేషన్ల స్వీకరణ శనివారం సాయంత్రంతో ముగిసింది. ఈ దశలో మొత్తం 4,236 గ్రామపంచాయతీలు, 37,440 వార్డుల్లో అభ్యర్థుల నుండి నామినేషన్లు స్వీకరించారని అధికారులు తెలిపారు. ఆదివారం నామినేషన్ల పరిశీలన జరిపి, చెల్లుబాటు అయిన నామినేషన్ల వివరాలను ప్రకటించనున్నారు. సోమవారం అప్పీళ్ల స్వీకరణ జరుగుతుంది. డిసెంబరు 2వ తేదీన అప్పీళ్ల పరిష్కారం పూర్తి చేయనున్నారు. డిసెంబరు 3న నామినేషన్ల ఉపసంహరణ గడువు ముగియగా, అదే రోజు తుది అభ్యర్థుల జాబితాను విడుదల చేయనున్నారు. డిసెంబరు 11న పోలింగ్, ఓట్ల లెక్కింపు, ఉపసర్పంచి ఎన్నికలు ఏకకాలంలో నిర్వహించనున్నట్లు తెలిపారు. ఇదిలా ఉండగా, నేటి నుంచి డిసెంబరు 2 వరకు రెండో దశ నామినేషన్లు స్వీకరించనున్నారు. రెండో విడతలో 193 మండలాలకు చెందిన 4,333 పంచాయతీలు, 38,350 వార్డుల్లో ఎన్నికలు జరగనున్నాయి.