కవిత విచారణకు ముందు లిక్కర్ పాలసీలో ఈడీ దూకుడు
ఢిల్లీ లిక్కర్ పాలసీ కేసులో ఆమ్ ఆద్మీ పార్టీ నేత మనీష్ సిసోడియాను ఎన్‌ఫోర్స్‌మెంట్ డైరెక్టరేట్ ఏడు రోజుల కస్టడీకి పంపింది. మద్యం పాలసీని రూపొందించడంలో మనీలాండరింగ్ ఆరోపణలపై ఢిల్లీ ఉప ముఖ్యమంత్రిని ప్రశ్నించడానికి ఈడీ 10 రోజులు కోరింది. లిక్కర్ స్కామ్‌లో సిసోడియా తీహార్ జైళ్లో ఉన్న సమయంలోనే… ఎన్‌ఫోర్స్‌మెంట్ డైరెక్టరేట్ నిన్న అరెస్ట్ చేసింది. దీనికి ముందు, ఢిల్లీ లిక్కర్ పాలసీని రూపొందించడంలో అవినీతికి పాల్పడ్డారనే ఆరోపణలపై సెంట్రల్ బ్యూరో ఆఫ్ ఇన్వెస్టిగేషన్ సిసోడియాను అరెస్టు చేసింది. సీబీఐ కేసులో బెయిల్ అభ్యర్థన ప్రత్యేక కోర్టులో ఇవాళ విచారణకు రావాల్సి ఉన్నా… దానిని మార్చి 21కి వాయిదా వేశారు. సిసోడియా కస్టడీ ఎందుకు అవసరమో వివరిస్తూ, ఢిల్లీ మద్యం పాలసీ కేసులో మనీ ట్రయల్ ఎక్కడికి దారితీస్తుందో తెలుసుకోవాలని ప్రత్యేక కోర్టుకు ED తెలిపింది.
నేరం ద్వారా వచ్చిన ఆదాయం కనీసం ₹ 292 కోట్లు అని ED అభియోగాలు నమోదు చేసింది. కేసు విచారణకు సంబంధించి అధికారులను పిలిపించాం. కస్టడీలో ఉన్న సిసోడియాతో వారితో కలిపి మాట్లాడాలనుకుంటున్నామని ఈడీ న్యాయవాది కోర్టుకు వివరించారు. సిసోడియా తరపు న్యాయవాది న్యాయపరమైన ప్రక్రియను అవమానించేలా… అరెస్టును ఒక హక్కుగా ఈడీ పరిగణిస్తోందని మండిపడ్డారు. ఈ రోజుల్లో ఏజెన్సీలు అరెస్టులను హక్కుగా తీసుకోవడం ఫ్యాషన్‌గా మారిపోయింది. ఈ హక్కుపై న్యాయస్థానాలు తీవ్రంగా పరిగణించాల్సిన సమయం ఆసన్నమైందని సిసోడియా తరపు న్యాయవాది దయన్‌కృష్ణ ఈరోజు ప్రత్యేక కోర్టులో అన్నారు.
కేంద్రం తమ పార్టీ నాయకులు, బీజేపీతో చేతులు కలిపినవారిపై తీవ్రమైన ఆరోపణలున్నా పట్టించుకోదని… రాజకీయ కక్ష సాధింపులో భాగమే సిసోడియా అరెస్ట్ అని మండిపడ్డారు ఆప్ ఎంపీ సంజయ్ సింగ్. “హిమంత బిస్వా శర్మ, సువేందు అధికారి, ముకుల్ రాయ్, నారాయణ్ రాణే, బీఎస్ యడియూరప్ప, శివరాజ్ చౌహాన్ వంటి వారిలో కొందరికి బిజెపి సహకరించిందని… కొందరికి బహుమతి కూడా ఇచ్చిందన్నారు. దర్యాప్తు సంస్థలను కేంద్రం దుర్వినియోగం చేస్తోందంటూ ఆరోపిస్తూ ఎనిమిది ప్రతిపక్షాలు గత వారం ప్రధాని నరేంద్ర మోదీకి లేఖలు రాశాయి. ఈ రోజు కోర్టు విచారణలో, సిసోడియా తరపు న్యాయవాది ఢిల్లీ లిక్కర్ పాలసీ ఫైల్ కూడా లెఫ్టినెంట్ గవర్నర్ వద్దకు వెళ్లిందని, ఆయన కూడా దానిని క్లియర్ చేశారని ఎత్తి చూపారు. కేసు విచారణలో భాగంగా లెఫ్టినెంట్ గవర్నర్‌ను సైతం ఈడీ ప్రశ్నిస్తుందని ఆశిస్తున్నామని ఆయన అన్నారు.
మధ్యవర్తులు, వ్యాపారవేత్తలు, రాజకీయ నాయకుల ఆరోపణ నెట్‌వర్క్‌ “సౌత్ గ్రూప్” గా ఏర్పడిందని నిఘా సంస్థలు నిర్ధారించాయి. “సౌత్ గ్రూప్‌కు చెందిన కంపెనీలకు సహాయం చేయడానికి ఢిల్లీ లిక్కర్ పాలసీని సవరించారని ఆప్ సర్కారు విమర్శలు ఎదుర్కొంటోంది. సిసోడియా ఎలాంటి సంప్రదింపులు లేకుండా పాలసీని మార్చేశారని ఈడీ ఆరోపిస్తోంది. రాడార్ కింద ఉన్న “సౌత్ గ్రూప్” వ్యక్తులలో ఒకరు భారత రాష్ట్ర సమితి నాయకురాలు కవిత. మార్చి 11న ఈడీ ముందు విచారణకు ఆమె అంగీకరించారు. ఢిల్లీ లిక్కర్ పాలసీలో కిక్‌బ్యాక్‌లతో కవిత లబ్ధి పొందారని ఈడీ ఆరోపించింది. ఐతే ఈ ఆరోపణలను కవిత ఖండించారు. కేంద్రం రాజకీయ లక్ష్యాల కోసం దర్యాప్తు సంస్థలను దుర్వినియోగం చేస్తోందని ఆమె ఆరోపించారు. సిసోడియా, ఇతరులు మద్యం కార్టలైజేషన్‌ను అనుమతించడం, కొంతమంది డీలర్లకు అనుకూలంగా ఉన్నారనే ఆరోపణలను ఎదుర్కొంటున్నారు. మొత్తం వ్యవహారంలో లంచం ప్రస్తావన లేనేలేదంటోంది ఆప్. ఐతే ఏ తప్పూ జరగనప్పుడు ఆప్ ఎందుకు లిక్కర్ పాలసీని రద్దు చేసిందని బీజేపీ దుయ్యబడుతోంది.
