తమిళంలో మాట్లాడిన ధనుష్

రాయన్ సినిమా వచ్చే వారం థియేటర్లోకి రాబోతోంది. జూలై 26న రాబోతోన్న ఈ చిత్రానికి సంబంధించిన ప్రీ రిలీజ్ ఈవెంట్‌ను హైద్రాబాద్‌‌లో నిర్వహించారు. ఈక్రమంలో ప్రీ రిలీజ్ ఈవెంట్‌లో ధనుష్ తమిళంలోనే మాట్లాడాడు. అందరికీ నమస్కారం అనే మాట తప్పా.. ఒక్క ముక్క కూడా తెలుగులో మాట్లాడలేదు. అయితే తనకు పవన్ కళ్యాణ్ ఇష్టమని, తారక్‌తో నటిస్తానని యాంకర్ అడిగిన ర్యాపిడ్ ఫైర్ ప్రశ్నలకు సమాధానం ఇచ్చాడు.

చెన్నైలో సినిమా ఈవెంట్ పెట్టి.. మన తెలుగు వాళ్లు అక్కడికి వెళ్లి.. స్టేజ్ మీద పూర్తిగా తెలుగులోనే మాట్లాడితే.. అసలు అక్కడి వాళ్లు పట్టించుకుంటారా? ఆ స్పీచ్ వింటారా?.. అసలు అక్కడ పూర్తిగా తెలుగులోనే మాట్లాడే ధైర్యం చేస్తారా? మొహమాటానికైనా నాలుగైదు తమిళ పదాలు నేర్చుకుంటారు.. దిల్ రాజులా ఏదో ఒకటి తమిళంలో మాట్లాడి వస్తుంటారు. కానీ ధనుష్ మాత్రం తన రాయన్‌ను తెలుగులో ప్రమోట్ చేసుకునేందుకు ఆదివారం నాడు ప్రీ రిలీజ్ ఈవెంట్ పెట్టాడు. ఆ ఈవెంట్‌లో అందరికీ నమస్కారం అనే పదం తప్పా.. మిగతా అంతా తమిళంలోనే దంచి కొట్టేశాడు.

‘నా కెరీర్ ప్రారంభంలోనే మంచి దర్శకులతో పనిచేసే అదృష్టం వచ్చింది.. రైట్ టైంలో రైట్ దర్శకులను కలిశాను.. ఒక్కో దర్శకుడు నాలోని ఒక్కో కోణాన్ని బయటకు తీశారు.. నేను అందరి దగ్గర్నుంచి ఎంతో నేర్చుకున్నాను.. వాళ్ల దగ్గరి నుంచి నేర్చుకున్న దానితోనే ఈ సినిమాను తీశాను..

నా ఏవీని చూస్తుంటే.. నాలోని తప్పులన్నీ కనిపించాయి.. నా తప్పులన్నీ సరి చేసుకుంటూ వస్తున్నాను.. నేను ఎప్పుడూ నా తప్పుల్ని సరి చేసుకుంటూనే ఉంటాను.. కళానిధి మారన్, ఏ ఆర్ రెహ్మాన్‌లకు థాంక్స్. ప్రకాష్ రాజ్, ఎస్ జే సూర్య వంటి వారి నుంచి ఎంతో నేర్చుకున్నాను.. నన్ను నమ్మి వీరంతా ఈ ప్రాజెక్టులోకి వచ్చారు.. ఎంత కాన్ఫిడెంట్‌గా ఉన్నా లోలోపల కాస్త భయంగా ఉండేది..

తమిళ ఆడియెన్స్‌కి మాత్రమే కాదు తెలుగు వారికి కూడా ఈ సినిమా నచ్చుతుందని భావిస్తున్నా.. పాటలు, డైలాగ్స్ అన్నీ కూడా ఇందులో ఉన్నాయి.. నేను ఏడేళ్ల నుంచీ ప్రకాష్ రాజ్ గారిని చూస్తున్నాను.. ఆయన ఎప్పుడూ సినిమాల గురించే ఆలోచిస్తుంటారు.. ఆయన పడిన కష్టాన్ని నేను చూశాను.. ఆయనలో ఒక శాతం చేసిన గొప్పే అనుకుంటాను.. ఆయనలా ఉండేందుకు ప్రయత్నిస్తుంటాను.. ఆయన సినిమాలకు ఎంతో సేవ చేశారు.. కళ మీద ఆయనుకున్న ప్యాషన్ నాకు తెలుసు..

రాయన్ మంచి చిత్రం అవుతుంది.. జూలై 26న రాబోతోంది. మీ అందరికీ నచ్చుతుందని భావిస్తున్నాను’ అంటూ తమిళంలోనే ధనుష్ మాట్లాడాడు. ఇక యాంకర్ అడిగిన ర్యాపిడ్ ఫైర్ ప్రశ్నల్లో భాగంగా.. పవన్ కళ్యాణ్, తారక్ గురించి మాట్లాడాడు. తెలుగు ఇండస్ట్రీ నుంచి ఏ హీరో అంటే ఇష్టమని యాంకర్ అడిగితే.. పవన్ కళ్యాణ్ ఇష్టమని, ఇతర హీరోల అభిమానులు తనని ద్వేషించొద్దని సరదాగా అనేశాడు. తారక్, చరణ్, అల్లు అర్జున్ అంటూ ఇలా కొన్ని ఆప్షన్స్ ఇచ్చి.. వీరిలో ఎవరితో మల్టీ స్టారర్ చేస్తారని అడిగితే.. తారక్‌తో చేస్తానని చెప్పుకొచ్చాడు.