రాష్ట్రపతి, స్పీకర్‌లను కోర్టులు ప్రశ్నించలేవు
తెలంగాణలో ఎమ్మెల్యేల ఫిరాయింపు వ్యవహారంపై సుప్రీంకోర్టు ఇచ్చిన తీర్పుపై శాసనసభ స్పీకర్ గడ్డం ప్రసాద్ కుమార్ సంయమిత స్పందన తెలిపారు. ‘‘ఇప్పుడే ఏవిధమైన వ్యాఖ్యలు చేయలేను, న్యాయ సలహా తీసుకున్న తరువాతే చర్యలు తీసుకుంటాం’’ అని స్పష్టంచేశారు. బీఆర్‌ఎస్ పార్టీ తరఫున గెలిచి, అనంతరం కాంగ్రెస్‌లోకి చేరిన పదిమంది ఎమ్మెల్యేల అనర్హతపై దాఖలైన పిటిషన్లకు సంబంధించి సుప్రీంకోర్టు జులై 30న తుది తీర్పు వెలువరించిన విషయం తెలిసిందే. ధర్మాసనం తీర్పులో స్పీకర్ నిర్ణయానికి మూడు నెలల గడువు విధించడంతో, అక్టోబర్ 31లోగా తుది నిర్ణయం తీసుకోవాల్సిన బాధ్యత స్పీకర్‌పై పడింది. ఈ నేపథ్యంలో గురువారం ఆయన మీడియాతో మాట్లాడుతూ, ‘‘అదాలత్ తీర్పు ప్రతిని స్వీకరించాం. ప్రస్తుతం న్యాయ నిపుణులతో సంప్రదించాలి. వారి సూచనల మేరకు చట్టపరమైన ప్రక్రియ కొనసాగుతుంది’’ అని తెలిపారు. ఇప్పటికే ఆ పదిమంది ఎమ్మెల్యేలకు నోటీసులు జారీ చేశామని స్పీకర్ తెలిపారు. నోటీసులకు స్పందన ఇచ్చేందుకు వారు కొంత గడువు కోరారని తెలిపారు. వారి సమాధానాల అనంతరం న్యాయ సలహా ఆధారంగా తగిన నిర్ణయం తీసుకుంటామని వివరించారు. ఇదే సమయంలో, మాజీ ఉపరాష్ట్రపతి జగదీప్ ధన్‌ఖడ్ చేసిన వ్యాఖ్యలను ఉదహరిస్తూ, ‘‘రాష్ట్రపతి, స్పీకర్‌లను కోర్టులు ప్రశ్నించలేవని’’ అభిప్రాయపడటం గమనార్హం. స్పీకర్ వ్యాఖ్యలపై కూడా రాజకీయ వర్గాల్లో చర్చ జరుగుతోంది. సుప్రీం తీర్పులో స్పష్టంగా, కాలపరిమితిలో నిర్ణయం తీసుకోవాల్సిన బాధ్యత స్పీకర్‌దేనని పేర్కొన్న సందర్భంలో, ఇప్పుడు ఆయన తీసుకునే ప్రతి చర్య ఆలస్యం అయితే ప్రభుత్వంపై, రాష్ట్ర అసెంబ్లీపై ప్రభావం చూపించనుంది. మరోవైపు కాంగ్రెస్‌లోకి చేరిన ఎమ్మెల్యేలు కూడా తాము చట్టపరమైన బలంగానే ఉన్నామని అంటున్న విషయం గమనార్హం. అయితే నోటీసులకు సమాధానాల ప్రక్రియ పూర్తయిన తరువాతే అసలు పరిస్థితి స్పష్టమవుతుంది. అయితే ఆ సమాధానాలు, న్యాయ నిపుణుల సూచనలు, స్పీకర్ నిర్ణయం, ఇవన్నీ అక్టోబర్ 31 లోగా ముగించాల్సిన సమయం నేపథ్యంలో వేగంగా జరిగే అవకాశం ఉంది.
