కాంగ్రెస్ డైలమా? సీఎం పీఠం డీకేకా? సిద్ధరామయ్యకా?
కర్ణాటకలో భారీ విజయాన్ని నమోదు చేసిన తర్వాత, కాంగ్రెస్‌కు ఇప్పుడు గందరగోళంలో ఉంది. ముఖ్యమంత్రి ఎంపిక పార్టీకి ఆందోళన కలిగిస్తోంది. పీసీసీ చీఫ్ డీకే శివకుమార్, సీనియర్ నాయకుడు సిద్ధరామయ్య ఇద్దరూ సీఎం పీఠాన్ని దక్కించుకోవాలని ఉవ్విళ్లూరుతున్నారు. కాంగ్రెస్ నియమించిన పరిశీలకుల బృందం ఆదివారం కొత్తగా ఎన్నికైన కర్ణాటక ఎమ్మెల్యేలను కలిసి ఎవరికి అగ్రస్థానం ఇవ్వాలనే దానిపై అభిప్రాయాలు తీసుకొంది. ఈ బృందం ఢిల్లీలో కాంగ్రెస్ అధ్యక్షుడు మల్లికార్జున్ ఖర్గే, సోనియా గాంధీ, ప్రియాంక గాంధీ వాద్రా, రాహుల్ గాంధీలతో కూడిన జాతీయ నాయకత్వంతో చర్చలు జరుపుతుంది.
ముఖ్యమంత్రి కోసం లాబీయింగ్ ఢిల్లీకి మారడంతో శివకుమార్, సిద్ధరామయ్య ఇద్దరూ కూడా ఈ రోజు దేశ రాజధానిలో పార్టీ నాయకత్వాన్ని కలవాలని భావిస్తున్నారు. ఐతే, ఇద్దరు నాయకులు ఢిల్లీ పిలుపు వచ్చే వరకు ఉండాలని, పార్టీ పిలిస్తే మాత్రమే ఢిల్లీకి రావాలని కోరినట్లు సమాచారం. ఇవాళ ఢిల్లీకి వస్తారా అని విలేకరులతో అడిగినప్పుడు, “వెళ్లాలా వద్దా అనేది ఇంకా నిర్ణయించుకోలేదు” అని శివకుమార్ చెప్పారు.
సీఎం ఎంపిక విషయంలో ఖర్గే నిర్ణయం తీసుకుంటారని, నిన్న సాయంత్రం కర్ణాటక ఎమ్మెల్యేల సమావేశం తర్వాత పార్టీ ప్రకటించింది. కాంగ్రెస్ ప్రధాన కార్యదర్శులు సుశీల్ కుమార్ షిండే, దీపక్ బబారియా, జితేంద్ర సింగ్ అల్వార్ ఈ సమావేశానికి పరిశీలకులుగా ఉన్నారు. సమావేశం జరిగిన బెంగళూరు హోటల్ వెలుపల డీకే శివకుమార్, సిద్ధరామయ్యల మద్దతుదారులు నినాదాలు చేశారు.
కర్ణాటక కొత్త ముఖ్యమంత్రి, మంత్రివర్గం గురువారం ప్రమాణస్వీకారం చేయనున్నట్టు విశ్వసనీయ వర్గాల సమాచారం. ఎనిమిది సార్లు ఎమ్మెల్యేగా గెలిచిన శివకుమార్, మాజీ ముఖ్యమంత్రి సిద్ధరామయ్య ఇద్దరూ ముఖ్యమంత్రి కావాలనే కోరికన బాహాటంగానే చెబుతున్నారు. 60 ఏళ్ల డీకే శివకుమార్ కాంగ్రెస్‌కు ట్రబుల్‌షూటర్‌గా గుర్తింపు పొందగా, సిద్ధరామయ్యకు కర్ణాటక అంతటా ప్రజల మద్దతు ఉంది. 224 మంది సభ్యుల కర్ణాటక అసెంబ్లీలో 135 స్థానాలను గెలుచుకున్న తర్వాత, పార్టీ చీఫ్ ఖర్గే, ఇద్దరు సీఎం ఆశావహులు కలిసి మీడియా సమావేశంలో పాల్గొన్నారు.
2018 రాష్ట్ర ఎన్నికలలో 104 స్థానాల గెలుచుకున్న బీజేపీ, తాజా ఎన్నికల్లో కేవలం 66 స్థానాలకే పరిమితమైంది. షెడ్యూల్డ్ తెగల (ఎస్టీ) కేటగిరీకి రిజర్వ్ చేసిన ఒక్క సీటు కూడా పార్టీ విజయం సాధించలేదు. కర్ణాటకలో 51 రిజర్వ్‌డ్ నియోజకవర్గాలు 36 షెడ్యూల్డ్ కులాల (SC) అభ్యర్థులకు, 15 ST అభ్యర్థులకు ఉన్నాయి.
