సిరాజ్‌కు ప్రభుత్వ ఉద్యోగం,ఇంటి స్థలం ఇస్తామన్న సీఎం రేవంత్ రెడ్డి
అంతర్జాతీయ క్రికెట్‌లో భారతదేశానికి, మన తెలంగాణ రాష్ట్రానికి గొప్ప పేరు, గౌరవాన్ని తెచ్చిన ఆల్ రౌండ్ క్రికెటర్ మొహమ్మద్ సిరాజ్‌ను తెలంగాణా సీఎం రేవంత్ రెడ్డి అభినందించారు. టీ-20 వరల్డ్ కప్‌ను గెలుచుకున్న అనంతరం హైదరాబాద్‌కు చేరుకున్న సిరాజ్ ఇవాళ ఉదయం ముఖ్యమంత్రిని ఆయన నివాసంలో మర్యాదపూర్వకంగా కలిశారు. ఈ సందర్బంగా ముఖ్యమంత్రి సిరాజ్‌ను ఘనంగా సన్మానించారు. ఈ సందర్భంగా సీఎం మాట్లాడుతూ.. మొహమ్మద్ సిరాజ్ అంతర్జాతీయ క్రికెట్‌లో అద్భుతమైన ప్రతిభను ప్రదర్శిస్తున్నాడన్నారు. అందుకే ఈ రోజు అత్యున్నత స్థాయి క్రికెటర్లలో ఒకడుగా పేరు సంపాదించుకున్నారని సీఎం ప్రశంసించారు.ఈ నేపథ్యంలో సిరాజ్‌కు రాష్ట్ర ప్రభుత్వం తరపున ఉద్యోగం, ఇంటి స్థలం కేటాయించాలని సీఎం అధికారులను ఆదేశించారు. హైదరాబాద్‌లో లేదా చుట్టుపక్కల ప్రాంతాల్లో అందుకు అనువైన స్థలాన్ని వెంటనే గుర్తించాలన్నారు.అలాగే ప్రభుత్వ ఉద్యోగం కల్పించేందుకు వెంటనే చర్యలు తీసుకోవలసిందిగా సీఎం రేవంత్ రెడ్డి అధికారులను ఆదేశించారు.
