హైడ్రా విధివిధానాలపై అధికారులకు పలు సూచనలు చేసిన సీఎం రేవంత్ రెడ్డి

తెలంగాణా సీఎం రేవంత్ రెడ్డి హైడ్రా ( హైదరాబాద్ డిజాస్టర్ రెస్పాన్స్ అండ్ ఎసెట్స్ మానిటరింగ్ అండ్ ప్రొటెక్షన్) విధివిధానాలపై ఇవాళ అధికారులతో సమీక్ష నిర్వహించారు. కాగా ఈ సమావేశంలో సీఎం హైడ్రా విధివిధానాలపై అధికారులకు కీలక సూచనలు చేశారు. హైదరాబాబద్‌లో ఔటర్ రింగ్ రోడ్డు వరకు 2వేల చదరపు కి.మీ పరిధిలో హైడ్రా విధులు నిర్వహించేలా చూడాలన్నారు.కాగా ఇప్పటి వరకు జీహెచ్ఎంసీ పరిధిలో ఉన్న అనధికారిక హోర్డింగ్స్, ఫ్లెక్సీలు తొలగింపు, అపరాధ రుసుము వసూలు బాధ్యత హైడ్రాకు బదలాయించాలన్నారు.జోన్ల విభజనలో పోలీస్ స్టేషన్ పరిధులు, అసెంబ్లీ నియోజకవర్గ పరిధులు పూర్తిగా ఒకే జోన్ లో వచ్చేలా జాగ్రత్త వహించాలన్నారు.నాళాలు, చెరువులు, ప్రభుత్వ స్థలాల ఆక్రమణల విషయంలో నిబంధనలు కఠినతరం చేసేలా అధ్యయనం చేయాలని సీఎం సూచించారు.హెచ్ఎండీఏ, వాటర్ వర్క్స్, డిజాస్టర్ మేనేజ్మెంట్, మున్సిపల్ విభాగాల మధ్య ఎప్పటికప్పుడు సమన్వయం ఉండేలా చూడాలన్నారు.కాగా తెలంగాణాలోనే ఒక బలమైన వ్యవస్థగా హైడ్రా ఉండాలన్నారు.అవసరమైతే దీని కోసం ప్రత్యేక నిధులు కేటాయించే అంశాన్ని పరిశీలించాలని అధికారులకు తెలిపారు.తెలంగాణా అసెంబ్లీ సమావేశాల్లోగా పూర్తిస్థాయి విధివిధానాలు రూపొందించాలని సీఎం రేవంత్ రెడ్డి అధికారులను ఆదేశించారు.