ఫారెన్ నెంబర్లను బ్లాక్ చేసి, రిపోర్ట్ చేయండి, వాట్సాప్ ప్రకటన
రెండు వందల కోట్ల మంది వినియోగిస్తున్న వాట్సప్‌లో ఇప్పుడు స్పామర్లు చొరబడటం పెద్ద గందరగోళానికి కారణమవుతోంది. వాట్సాప్ కష్టమర్లను మోసగించడానికి ఇప్పుడు పెద్ద స్కామ్ జరుగుతోంది. భారతదేశంలోని చాలా మంది వాట్సాప్ వినియోగదారులు తెలియని అంతర్జాతీయ నంబర్‌ల నుండి మిస్డ్ కాల్‌లను గుర్తించారు. ఈ కాల్‌లు, ఆడియో మరియు వీడియో రెండూ తరచుగా మలేషియా, కెన్యా, వియత్నాం, ఇథియోపియా వంటి దేశాల నుండి వచ్చిన ISD కోడ్‌ల ద్వారా వస్తున్నట్టు నిర్ధారించారు. ఈ కాల్ చేసిన వారు ఎవరు, వారి అజెండాలు ఏమిటనే ఇప్పటి వరకు నిర్ధారించలేని పరిస్థితి నెలకొంది. చాలా మంది వినియోగదారులు వారి కాల్ రికార్డ్‌ల స్క్రీన్‌షాట్‌తో, ఫిర్యాదులు ట్విట్టర్‌‌లో పంచుకుంటున్నారు.
అంతర్జాతీయ కాల్స్‌పై స్పందించిన వాట్సాప్
ఆందోళనలపై స్పందిస్తూ, వాట్సాప్ ఒక ప్రకటన విడుదల చేసింది. అనుమానాస్పద ఖాతాలను వెంటనే బ్లాక్ చేసి రిపోర్ట్ చేయాలని వినియోగదారులకు సూచించింది. తద్వారా అవసరమైన చర్యలు తీసుకోవచ్చంది. ”వాట్సాప్‌లో, చేసే ప్రతి పనిలో వినియోగదారుల భద్రత ప్రధానమైంది. స్కామ్‌ల నుండి రక్షించుకోవడానికి వారిని సన్నద్ధం చేసే వనరులు, సాధనాలతో వినియోగదారులను శక్తివంతం చేయడానికి కృషి చేసాం. ఎండ్-టు-ఎండ్ ఎన్‌క్రిప్టెడ్ మెసేజింగ్ సర్వీస్‌లలో దుర్వినియోగాన్ని నిరోధించడంలో వాట్సాప్ పరిశ్రమలోనే ముందుంది. ఏళ్ల తరబడి గణనీయమైన సేవలు అందిస్తున్నాం. వినియోగదారులు సురక్షితంగా ఉండటానికి తగిన అవగాహన కల్పిస్తున్నాం. అనుమానాస్పద సందేశాలు/కాల్‌లను నిరోధించడం, నివేదించడం అనేది మోసాలను సమర్థవంతంగా ఎదుర్కోవడానికి వీలు కలిగిస్తుంది. వినియోగదారులు తెలియని అంతర్జాతీయ లేదా దేశీయ ఫోన్ నంబర్‌ల నుండి కాల్‌లను స్వీకరించడానికి బ్లాక్ చేయడం, రిపోర్ట్ చేయడం ముఖ్యం.” అని వాట్సాప్ ప్రకటనలో తెలిపింది.
వినియోగదారులు యాప్ గోప్యతా నియంత్రణలను సద్వినియోగం చేసుకోవాలని, ఖాతాలను రక్షించడంలో సహాయపడటానికి వారి పరిచయస్తులకు మాత్రమే వ్యక్తిగత వివరాలను కనిపించేలా ఉంచాలని కూడా సూచించింది. ”అదనంగా, మా ప్లాట్‌ఫార్మ్‌లో వినియోగదారులను సురక్షితంగా ఉంచడానికి ఆర్టిఫిషియల్ ఇంటెలిజెన్స్, ఇతర అత్యాధునిక సాంకేతిక పరిజ్ఞానం, డేటా శాస్త్రవేత్తలు, నిపుణులు, ప్రక్రియలలో స్థిరంగా పెట్టుబడి పెట్టాం. IT నియమాలు 2021కి అనుగుణంగా ప్రచురించే మా నెలవారీ వినియోగదారు భద్రతా నివేదికలో స్వీకరించబడిన వినియోగదారు ఫిర్యాదుల వివరాలు, వాట్సాప్ ద్వారా సంబంధిత చర్యలు అలాగే మా ప్లాట్‌ఫార్మ్‌లో దుర్వినియోగాన్ని ఎదుర్కోవడానికి వాట్సాప్ సొంతంగా తగు భద్రతా ప్రమాణాలు పాటిస్తుంది. మంత్లీ రిపోర్ట్‌లో పేర్కొన్నట్టుగా వాట్సాప్ మార్చి నెలలోనే 4.7 మిలియన్లకు పైగా ఖాతాలను నిషేధించింది, ”అని ప్రకటన పేర్కొంది.
వినియోగదారులను ఇబ్బంది కలగకుండా సహాయపడేలా వాట్సాప్ అనేక ఫీచర్లను తీసుకొచ్చిందని సంస్థ పేర్కొంది. టూ-స్టెప్ వెరిఫికేషన్, బ్లాక్, రిపోర్ట్, గోప్యతా నియంత్రణల వంటి భద్రతా సాధనాల గురించి వినియోగదారులకు అవగాహన కల్పించడానికి “వాట్సాప్‌తో సురక్షితంగా ఉండండి” అనే భద్రతా ప్రచారాన్ని ప్రారంభించినట్లు కంపెనీ పేర్కొంది. ఆన్‌లైన్ స్కామ్‌లు, మోసాలు బెదిరింపుల నుండి రక్షణ కల్పిస్తామని స్పష్టం చేసింది.
వాట్సాప్‌లో నంబర్‌ను ఎలా బ్లాక్ చేయాలి
- వాట్సాప్‌లో నంబర్‌ను బ్లాక్ చేయడానికి, వినియోగదారులు ముందుగా కాంటాక్ట్‌ చాట్ తెరవాలి
- తర్వాత, కాల్ ఆప్షన్ పక్కన ఉన్న మూడు చుక్కలపై క్లిక్ చేయాలి.
నంబర్‌ను బ్లాక్ చేయాలి.
- బ్లాక్ చేయబడిన పరిచయాలు ఇకపై మీకు కాల్ చేయలేరు, లేదా మేసేజ్‌లు ఇకపై పంపలేరు. మీరు చివరిగా చూసిన, ఆన్‌లైన్ చర్యలు, మార్పులు, మీ ప్రొఫైల్ ఫోటోలో చేసిన ఏవైనా మార్పులు మీరు బ్లాక్ చేసిన పరిచయాలకు కనిపించవు.
