అరవింద్ కేజ్రీవాల్‌కు ఎదురుదెబ్బ, ఇవాళ కేసు విచారించలేమన్న సుప్రీం కోర్టు
ఢిల్లీ ముఖ్యమంత్రి అరవింద్ కేజ్రీవాల్ ఈ వారాంతం మొత్తం తీహార్ జైలులో గడపనున్నారు. ఢిల్లీ హైకోర్టు తీర్పును సవాల్‌పై సుప్రీంకోర్టు ఈరోజు విచారణ చేపడుతుందని భావించినా… అత్యున్నత న్యాయస్థానం తదుపరి విచారణ సోమవారం చేపడతామంది. కేజ్రీవాల్ అప్పీల్‌పై అత్యవసర విచారణ కోసం సుప్రీంకోర్టు ప్రత్యేక బెంచ్‌ను ఏర్పాటు చేయబోమని కోర్టు పేర్కొంది. సుప్రీంకోర్టు క్యాలెండర్ ప్రకారం, ఈద్-ఉల్-ఫితర్ కోసం కోర్టు గురువారం మూసివేయబడుతుంది, శుక్రవారం స్థానిక సెలవుదినం, ఆపై వారాంతం వస్తుంది. సోమవారం కోర్టు తిరిగి తెరవబడుతుంది. కేజ్రీవాల్ తరఫు న్యాయవాది, సీనియర్ న్యాయవాది అభిషేక్ సింఘ్వీ ఈ ఉదయం భారత ప్రధాన న్యాయమూర్తి డివై చంద్రచూడ్ ముందు ఈ అంశాన్ని లేవనెత్తారు. ఢిల్లీ లిక్కర్ స్కామ్‌లో మనీలాండరింగ్ కేసులో ఎన్‌ఫోర్స్‌మెంట్ డైరెక్టరేట్ (ED) మార్చి 21న తనను అరెస్టు చేయడంపై కేజ్రీవాల్ చేసిన సవాలును హైకోర్టు నిన్న తోసిపుచ్చింది.
