నగరంలో మరో అగ్ని ప్రమాదం

రాచకొండ కమిషనరేట్‌ పరిధిలోని బాలాపూర్ పోలీస్ స్టేషన్‌ ప్రాంతానికి చెందిన బాబానగర్‌లో సోమవారం ఉదయం తీవ్ర అగ్నిప్రమాదం సంభవించింది. ఒక ప్లాస్టిక్ ఉత్పత్తుల కంపెనీలో జరిగిన ఈ ప్రమాదం వల్ల మంటలు వేగంగా వ్యాపించి, దట్టమైన పొగ వ్యాపించడంతో చుట్టుపక్కల నివాసితులు తీవ్ర భయాందోళనకు గురయ్యారు. స్థానికులు వెంటనే అగ్నిమాపక శాఖను, పోలీసులను సమాచారం అందించగా, రెండు అగ్నిమాపక యంత్రాలు ఘటనాస్థలానికి చేరుకుని మంటలను అదుపు చేయడానికి ప్రయత్నించాయి. ప్రాధమిక సమాచారం ప్రకారం, ఈ ప్రమాదంలో ప్రాణనష్టం జరగలేదు, కానీ ప్లాస్టిక్ దానా మరియు ఇతర వస్తువులు కాలిపోయి భారీ ఆస్తినష్టం జరిగింది. ప్రమాదానికి షార్ట్ సర్క్యూట్ కారణమై ఉండవచ్చని అనుమానాలు వ్యక్తమవుతున్నప్పటికీ, అసలైన కారణం తెలియాల్సి ఉంది. ఘటనపై బాలాపూర్ పోలీసులు కేసు నమోదు చేసి దర్యాప్తు ప్రారంభించారు. గత కొన్ని రోజులుగా రాష్ట్రంలో వరుసగా జరుగుతున్న అగ్నిప్రమాదాలు ప్రజల్లో ఆందోళనకు దారి తీస్తున్నాయి.