హిల్టప్ పాలసీ వల్ల అన్ని లాభాలే
హిల్టప్ పాలసీ వల్ల రాష్ట్రానికి అనేక మేలులు జరగబోతున్నాయని మంత్రి ఉత్తమ్ కుమార్ రెడ్డి అన్నారు . బీఆర్ఎస్, బీజేపీ చేస్తున్న విమర్శలు పూర్తిగా అసత్యప్రచారమని ఆయన పేర్కొన్నారు . గాంధీభవన్ లో గురువారం ఆయన మీడియా సమావేశంలో మాట్లాడుతూ ప్రతిపక్షాలకు పాలసీ గురించి సరైన అవగాహన లేకనే మాట్లాడుతున్నారో, లేక కావాలనే ప్రజలను తప్పుదారి పట్టించే ప్రయత్నం చేస్తున్నారో అర్థం కావడం లేదన్నారు. హైదరాబాద్‌ను కాలుష్యరహిత నగరంగా మార్చాలన్న ఉద్దేశ్యంతోనే ప్రభుత్వం ఈ నిర్ణయం తీసుకుందని, ఇది కొత్తగా తెచ్చిన పాలసీ కాదని స్పష్టం చేశారు. ఇండస్ట్రీలను ఓఆర్ఆర్ వెలుపలకు మార్చాలన్న డిమాండ్ పాతదేనని, బీఆర్ఎస్ ప్రభుత్వ కాలంలో కూడా ఇదే అంశంపై చర్చ జరిగిన విషయాన్ని గుర్తుచేశారు. ఢిల్లీలో కాలుష్యం ప్రమాదకరస్థాయికి చేరిన పరిస్థితి హైదరాబాద్‌లో రాకూడదన్న దృష్టితోనే హిల్టప్ పాలసీ అమల్లోకి వస్తోందని తెలిపారు. కాంగ్రెస్ ప్రభుత్వం చేపట్టిన పనులను నిరాధార ఆరోపణలు చేసి బద్నాం చేయాలన్న ఉద్దేశంతోనే ప్రతిపక్షాలు ప్రచారం చేస్తున్నాయన్నారు. కొత్త ఇండస్ట్రియల్ పాలసీ రూపకల్పనలో తాను భాగమని, దీని ద్వారా రాష్ట్రానికి అదనపు ఆదాయం వచ్చే అవకాశం ఉందని పేర్కొన్నారు. ఈ పాలసీలో కుంభకోణాలకు ఎట్టి అవకాశమూ లేదని, అత్యంత పారదర్శకంగా ప్రభుత్వం పని చేస్తోందని ఉత్తమ్ స్పష్టం చేశారు.
పవర్ గ్రిడ్‌ భూముల విషయంలో బీఆర్ఎస్ చేస్తున్న కుంభకోణ ఆరోపణలను ఖండించిన ఆయన, 50 వేల కోట్లు కాదు, 50 వేల రూపాయలకైనా స్కాం జరగలేదని అన్నారు. 2014 రాష్ట్ర విభజన చట్ట ప్రకారం ఎన్టీపీసీ ద్వారా 4,000 మెగావాట్ల పవర్ ప్లాంట్ ఏర్పాటు చేయాలని కేంద్రం చెప్పినప్పటికీ, అది ఇప్పటికీ ఎందుకు పూర్తికాలేదో బీఆర్ఎస్ నాయకులు సమాధానం చెప్పాలని డిమాండ్ చేశారు. గత ప్రభుత్వం ఇండియా బుల్స్ కంపెనీ నుంచి ఉపయోగంలో లేని పరికరాలను ఎందుకు కొనుగోలు చేసిందని, భద్రాద్రి ప్రాజెక్టుకు పాతబడిన టెక్నాలజీ ఎంచుకోవాల్సిన అవసరం ఏమిటని ప్రశ్నించారు. భద్రాద్రి ప్రాజెక్టు అనవసరంగా తెలంగాణ ప్రజలపై రుద్దిన భారమని తీవ్రంగా విమర్శించారు. నల్గొండ డీసీసీ నియామకంపై స్పందించిన ఉత్తమ్, అది పార్టీ అంతర్గత విషయం కాబట్టి బహిరంగంగా మాట్లాడలేనని తెలిపారు. బీఆర్ఎస్‌లోని కొంతమంది నాయకులు తాము అధికారంలోకి వస్తే పాలసీ మార్చేస్తామని చేసే వ్యాఖ్యలపై స్పందిస్తూ, వారు మళ్లీ అధికారంలోకి వచ్చేది లేదని, పాలసీ మార్చే ప్రశ్నే లేదని స్పష్టం చేశారు
