టీచర్‌‌తో ప్రేమ… పెళ్లి కుదరడంతో…
తాను ప్రేమించిన ట్యూషన్‌ టీచర్‌కు పెళ్లి నిశ్చయం కావడంతో ఓ విద్యార్థి ఆత్మహత్యకు పాల్పడిన ఘటన చెన్నైలోని అంబత్తూరులో చోటుచేసుకుంది. చెన్నైలోని అంబత్తూరుకు చెందిన 12వ తరగతి చదువుతున్న విద్యార్థి(17) తాను చదివే సర్ రామస్వామి ముదలియార్ హయ్యర్ సెకండరీ పాఠశాలలో పనిచేస్తున్న టీచర్‌ను ప్రేమించాడు. ఆమె వద్దకే బాలుడు ట్యూషన్‌కు వెళ్లేవాడు. ఈ క్రమంలో ఆమెతో ఏర్పడిన పరిచయం ప్రేమకు దారి తీసింది. ఆ టీచర్ కూడా అతడిని ప్రేమిస్తున్నట్లు సమాచారం. కాగా ఇటీవల ఆమెకు వివాహం నిశ్చయం కావడంతో విద్యార్థితో మాట్లాడడం మానేసింది. ఆ తర్వాత ఆమె తనను పట్టించుకోవడం లేదని మనస్తాపం చెందిన విద్యార్థి మనస్తాపానికి గురయ్యాడు.
ఆగస్టు 30వ తేదీన స్నేహితులతో కలిసి చెన్నై రాజధాని కళాశాలలో కౌన్సెలింగ్‌కి వెళ్లి తిరిగి ఇంటికి వచ్చాడు. అనంతరం గదిలో ఉరేసుకొని ఆత్మహత్యాయత్నం చేశాడు. గమనించిన తల్లిదండ్రులు అతడిని చికిత్స నిమిత్తం ఆస్పత్రికి తరలిస్తుండగా మృతి చెందాడు. విద్యార్థి మృతి కేసులో ఉపాధ్యాయురాలిని పోక్సో చట్టం కింద పోలీసులు అరెస్టు చేశారు.
