టర్కీ, సిరియాలో శక్తివంతమైన భూకంపం, వందల మంది మృతి
సోమవారం టర్కీ, సిరియాలో 7.8 తీవ్రతతో సంభవించిన శక్తివంతమైన భూకంపంతో వంద మందికి పైగా మరణించారు. ప్రజలు నిద్రలో ఉండగానే భవనాలను నేలమట్టం చేసింది. సైప్రస్ ద్వీపం వరకు ప్రకంపనలను వ్యాపించాయి. టర్కీలోని స్థానిక అధికారులు ఇప్పటి వరకు 53 మంది చనిపోయినట్టుగా చెబుతున్నారు. చాలా మందిని ఇంట్లో నిద్రిస్తున్నప్పుడు భూకంపం రావడం వల్ల మృతుల సంఖ్య భారీగా పెరుగుతుందని అంచనా వేస్తున్నారు. సిరియాలోని ప్రభుత్వ నియంత్రణలో ఉన్న ప్రాంతాల్లో 42 మంది మరణించారని, టర్కిష్ అనుకూల వర్గాల నియంత్రణలో ఉన్న ఉత్తర ప్రాంతాలలో మరో ఎనిమిది మంది మరణించారని స్థానిక ఆసుపత్రి AFPకి తెలిపింది. “ప్రాథమిక సంఖ్యలో భూకంపం కారణంగా అలెప్పో, హమా, లటాకియాలో నలభై రెండు మరణాలు, 200 గాయపడినట్టు తేలింది” అని ఆరోగ్య మంత్రిత్వ శాఖ అధికారిని ఉటంకిస్తూ రాష్ట్ర వార్తా సంస్థ సనా తెలిపింది. టర్కీలో ప్రజలు మంచులో నిలబడి, దెబ్బతిన్న ఇళ్ల శిధిలాల కింద బతికున్నవారిని రక్షించేందుకు ప్రయత్నిస్తున్నారు.
స్థానిక కాలమానం ప్రకారం తెల్లవారుజామున 04:17 గంటలకు, 17.9 కిలోమీటర్ల (11 మైళ్లు) లోతులో భూకంపం సంభవించిందని, 15 నిమిషాల తర్వాత 6.7 తీవ్రతతో భూకంపం సంభవించిందని యుఎస్ ఏజెన్సీ తెలిపింది. టర్కీ AFAD అత్యవసర సేవా కేంద్రం మొదటి భూకంప తీవ్రతను 7.4గా పేర్కొంది. వందేళ్లలో సంభవించిన అతిపెద్ద భూకంపమని అధికారులు భావిస్తున్నారు. భూకంపం వల్ల నష్టపోయిన మా పౌరులందరికీ టర్కీ అధ్యక్షుడు రెసెప్ తయ్యిప్ ఎర్డోగాన్ సంతాపం ప్రకటించారు. వీలైనంత త్వరగా, అతి తక్కువ నష్టంతో విపత్తును అధిగమించగలమని ఆశిస్తున్నామన్నారు ఎర్డోగాన్. భూకంపం దక్షిణ టర్కీ, పొరుగున ఉన్న సిరియాలోని ప్రధాన నగరాల్లో డజన్ల కొద్దీ భవనాలను నేలమట్టం చేసింది. మృతుల సంఖ్య భారీగా పెరుగుతుందని భావిస్తున్నారు.
టర్కీ ప్రాంతంలోని డ్యూజ్ 1999లో 7.4-తీవ్రతతో కూడిన భూకంపాన్ని చవి చూసింది. దశాబ్దాలలో టర్కీని తాకిన అత్యంత ఘోరమైన భూకంపం. ఆ భూకంపం రాజధాని ఇస్తాంబుల్‌లో వెయ్యి మంది మృతి చెందితే మొత్తం 17,000 మంది దేశమంతటా మృతి చెందారు. పెద్ద భూకంపం ఇస్తాంబుల్‌ను నాశనం చేయగలదని నిపుణులు చాలా కాలంగా హెచ్చరిస్తున్నారు, భద్రతకు ప్రమాదం వాటిల్లేలా భవన నిర్మాణాలకు అనుమతివ్వడం వల్ల భూకంపాలతో పెను విధ్వంసం జరుగుతుందని ఎక్స్‌పర్ట్స్ హెచ్చరిస్తూనే ఉన్నారు. 2020 జనవరిలో ఎలాజిగ్‌లో 6.8 తీవ్రతతో భూకంపం సంభవించి 40 మందికి పైగా మరణించారు. అదే సంవత్సరం అక్టోబరులో, టర్కీ యొక్క ఏజియన్ తీరంలో 7.0 తీవ్రతతో సంభవించిన భూకంపం 114 మంది మరణించారు మరియు 1,000 మందికి పైగా గాయపడ్డారు.
