రాజధాని భూములపై తక్షణమే శ్వేతపత్రం విడుదల చేయాలి

విజయవాడ :ఆంధ్రప్రదేశ్‌ కూటమి ప్రభుత్వంపై, ముఖ్యమంత్రి చంద్రబాబునాయుడు లక్ష్యంగా ఏపీ కాంగ్రెస్ అధ్యక్షురాలు వైఎస్ షర్మిల శనివారం తీవ్ర విమర్శలు గుప్పించారు. అమరావతి రాజధాని కోసం రెండో విడత భూసేకరణ చేపట్టే ప్రభుత్వ నిర్ణయాన్ని తీవ్రంగా తప్పుపడుతూ, ఇది రియల్ ఎస్టేట్ మాఫియాకు అనుకూలంగా ఉందని ఆరోపించారు.
షర్మిల పేర్కొన్న విధంగా, తొలి విడతలో ఇప్పటికే ప్రభుత్వ భూములతో కలిపి 54 వేల ఎకరాల్లో అభివృద్ధి పూర్తయ్యిందని, రైతుల నుంచి తీసుకున్న 34 వేల ఎకరాల్లో ఒక్క కిలోమీటర్ నిర్మాణం కూడా జరగలేదని ఆమె విమర్శించారు. ఇకపై కొత్తగా మరో 16 వేల ఎకరాలను సేకరిస్తున్న ప్రభుత్వ నిర్ణయం అనవసరమని, బిజినెస్ , పెద్ద పరిశ్రమలకు భూములు అందించడం కోసం మాత్రమే ప్రయత్నిస్తోందని షర్మిల ఆందోళన వ్యక్తం చేశారు. అమరావతి భవిష్యత్తును దేశంలోని పెద్ద విమానాశ్రయాలు, అంతర్జాతీయ క్రీడా నగరాలతో పోలుస్తూ, షర్మిల ప్రశ్నించారు. ముంబై విమానాశ్రయానికి 1850 ఎకరాలు, భోగాపురం ఎయిర్‌పోర్ట్‌కు 2200 ఎకరాలు సరిపోతే, అమరావతికి 5 వేల ఎకరాలు ఎందుకు కావాలనేది ఆమె ప్రశ్నించారు. బీజింగ్, లండన్ ఒలింపిక్ స్పోర్ట్స్ సిటీలను 150 ఎకరాల్లోనే నిర్మించగలిగితే, ఇక్కడ 2500 ఎకరాలు అవసరమా అని ప్రశ్న చేశారు.
రాజధాని భూములపై ప్రభుత్వాన్ని తక్షణమే శ్వేతపత్రం విడుదల చేయాలని, అఖిలపక్ష సమావేశం ఏర్పాటు చేసి ప్రజలలో ఉన్న అనుమానాలను నివృత్తి చేయాలని షర్మిల డిమాండ్ చేశారు. ఆమె పేర్కొన్నట్టుగా, రెండో విడత భూసేకరణకు కాంగ్రెస్ పార్టీ కట్టుబడి వ్యతిరేకమని స్పష్టం చేశారు. రాజధాని నిర్మాణం విభజన హామీలో భాగంగా కేంద్ర ప్రభుత్వ బాధ్యత అని, కేంద్ర ఆర్థిక మంత్రి రాష్ట్రానికి వచ్చినప్పుడు నిధులు అడగకుండా సన్మానాలు చేయడం ఏంటని ప్రభుత్వాన్ని విమర్శించారు.