హమాస్ చెరనుండి ఇజ్రాయెల్ పౌరులు విడుదల

దాదాపు రెండేళ్లుగా హమాస్ చెరలో బందీలుగా ఉన్న ఇజ్రాయెల్ పౌరులకు చివరికి విముక్తి లభించింది. గాజా ప్రాంతంలో బందీల విడుదల ప్రక్రియ ప్రారంభమవగా, తొలివిడతలో ఏడుగురు ఇజ్రాయెల్ బందీలను హమాస్ రెడ్ క్రాస్ ప్రతినిధులకు అప్పగించింది. తర్వాత మిగిలిన కొంతమందిని కూడా విడుదల చేసినట్లు సమాచారం. ఇప్పటికే రెడ్ క్రాస్ వాహన శ్రేణి ఖాన్ యూనిస్ ప్రాంతానికి చేరుకుంది.
ఈ పరిణామంపై ఇజ్రాయెల్ ప్రధాని బెంజమిన్ నెతన్యాహు, ఆయన సతీమణి బందీలకు స్వాగతం పలుకుతూ ప్రత్యేక సందేశం విడుదల చేశారు. మా పౌరులు తిరిగి రావడం ఆనందకరమైన విషయం. ప్రతి బందీ సురక్షితంగా ఇంటికి చేరేవరకు మా ప్రయత్నం కొనసాగుతుంది అని నెతన్యాహు పేర్కొన్నారు.
ఇక విడుదలైన బందీల కుటుంబ సభ్యులు, బంధువులు, శ్రేయోభిలాషులు కన్నీరు పెట్టుకుంటూ ఆత్మీయంగా స్వాగతం పలికారు. గాజా సరిహద్దు ప్రాంతాల వద్ద ప్రజలు సంబరాలు జరుపుకుంటున్నారు. వీడియోలు, ఫొటోలు సామాజిక మాధ్యమాల్లో వైరల్‌గా మారాయి. హమాస్ చేతిలో ఇరుక్కున్న వారి రక్షణతో ఇజ్రాయెల్ ప్రజల్లో ఊరట నెలకొంది.

2023 అక్టోబర్ 7న హమాస్ తీవ్రవాదులు ఇజ్రాయెల్‌పై భారీ దాడి చేపట్టారు. ఈ దాడిలో 1200 మందికి పైగా ఇజ్రాయెల్ పౌరులు మరణించగా, 251 మందిని బందీలుగా తీసుకెళ్లారు. వారిలో కొంతమందిని గతంలో విడుదల చేయగా, కొందరిని ఇజ్రాయెల్ సైన్యం రక్షించింది. మిగతా వారు మరణించినట్టు నిర్ధారణ అయింది.

అమెరికా మాజీ అధ్యక్షుడు డొనాల్డ్ ట్రంప్ ప్రతిపాదించిన 20 సూత్రాల శాంతి ప్రణాళికలో భాగంగా ఇటీవల ఇజ్రాయెల్, హమాస్ మధ్య కాల్పుల విరమణ ఒప్పందం కుదిరింది. ఈ ఒప్పందం శుక్రవారం నుంచి అమల్లోకి వచ్చింది.
దీనిలో భాగంగా హమాస్ తమ వద్ద ఉన్న 48 మంది బందీలను విడుదల చేయడానికి అంగీకరించింది. అందులో 20 మంది సజీవంగా ఉన్నారు. ప్రతిగా ఇజ్రాయెల్ ప్రభుత్వం 2,000 మందికి పైగా పాలస్తీనా ఖైదీలను విడుదల చేయనుంది.

ఈ విడుదల ప్రక్రియ పూర్తయిన తర్వాత ట్రంప్ శాంతి ప్రణాళిక రెండో దశపై చర్చలు ప్రారంభమవుతాయి. ఇందులో హమాస్ తమ ఆయుధాలను త్యజించడం, గాజా నుంచి ఇజ్రాయెల్ సైనిక దళాల ఉపసంహరణ వంటి అంశాలు ప్రధానంగా చర్చకు రానున్నాయి.
ఈ చర్చల్లో అమెరికా, ఈజిప్టు, ఖతార్ దేశాలు మధ్యవర్తులుగా వ్యవహరిస్తున్నాయి. ప్రస్తుత విడుదలతో ఇజ్రాయెల్-హమాస్ మధ్య సంబంధాల్లో కొంత ఊరట వచ్చినప్పటికీ, శాంతి పూర్తిస్థాయిలో నెలకొనేందుకు ఇంకా పెద్ద సవాళ్లు ఎదురుచూస్తున్నాయి.