శ్రీలంకలో వరదలతో 56 మంది మృతి

శ్రీలంకలో గత కొన్నిరోజులుగా భారీ వర్షాలకు అతలాకుతలంగా మారింది. దిత్వా తుపాన్ ప్రభావంతో ఆకస్మిక వరదలు, కొండచరియలు విరిగిపడడంతో 56 మంది మృతి చెందారని ప్రభుత్వ విపత్తు నిర్వహణ కేంద్రం అధికారులు వెల్లడించారు. మరో 21 మంది అచూకీ తెలియడం లేదు. వరద ధాటికి 600కి పైగా ఇళ్లు, పాఠశాలలు పూర్తిగా దెబ్బతిన్నాయి. పలు వంతెనలు కొట్టుకుపోయి , రవాణా స్తంభించడంతో రాకపోకలకు ఆటంకం కలుగుతోంది. అనేక రహదారులు, పొలాలు జల దిగ్బంధం కావడంతో , ఏటు చూసినా నదుల వలె తాండవిస్తోంది. శ్రీలంకలో సంభవించిన వరదల్లో గల్లంతైన వారికోసం ముమ్మర గాలింపు చర్యలు కొనసాగుతున్నాయి. శిథిలాల కింద చిక్కుకున్న వారిని వెలికితీయడానికి అధికారులు నిరంతరం ఆపరేషన్ నిర్వహిస్తున్నారు. అనేక నగరాలు వరద నీటితో ముంచెత్తబడడంతో ప్రభుత్వం అన్ని ప్రభుత్వ కార్యాలయాలు, పాఠశాలలను తాత్కాలికంగా మూసివేసింది. రైలు సర్వీసులు నిలిపివేయబడగా, రవాణా వ్యవస్థ తీవ్రంగా దెబ్బతింది. వరద ప్రభావిత ప్రాంతాల్లో భద్రతా బలగాలు, విపత్తు నిర్వహణ బృందాలు అత్యవసర సహాయక చర్యల్లో నిమగ్నమయ్యాయి. మరిన్ని ప్రాంతాలకు భారీ వర్షాలు కురిసే అవకాశాలపై స్థానిక వాతావరణ విభాగం కొత్త హెచ్చరికలు జారీ చేసింది. ప్రజలను సురక్షిత ప్రాంతాలకు తరలించే చర్యలు వేగవంతమయ్యాయి. శ్రీలంకలో వరదల కారణంగా దాదాపు 56మంది ప్రాణాలు కోల్పోవడంపై భారత ప్రధాని నరేంద్ర మోదీ తీవ్ర విచారం వ్యక్తం చేశారు. కష్ట సమయంలో పొరుగు దేశానికి సాయం అందించడం భారత్ ప్రధాన కర్తవ్యమని ఆయన పేర్కొన్నారు. ఈ నేపథ్యంలో ‘ఆపరేషన్ సాగర్ బంధు’ పేరుతో అత్యవసర మానవతా సాయం శ్రీలంకకు పంపినట్లు భారత ప్రభుత్వం ప్రకటించింది. ఈ ఆపరేషన్ ద్వారా ఆహారం, ఔషధాలు, తాగునీరు, అవసరమైన రక్షణ సామగ్రి పంపిణీ చేయబడుతోంది. రెండు దేశాల మధ్య స్నేహబంధాన్ని బలోపేతం చేస్తూ ఈ చర్య సంక్షోభ సమయంలో శ్రీలంకకు కీలక మద్దతునందిస్తోంది.