రాగి గనిలో వంతెన కూలి 32 మంది మృతి
కాంగో: కాంగోలో మరొకసారి ఘోర విషాదం చోటుచేసుకుంది. లువాలాబా ప్రావిన్స్‌లోని కలాండో రాగి గనిలో వంతెన కూలిపోవడంతో 32 మంది కార్మికులు ప్రాణాలు కోల్పోయినట్లు స్థానిక మీడియా నివేదికలు వెల్లడించాయి.
అధికారుల వివరాల ప్రకారం, ప్రాంతంలో కాల్పుల శబ్దం వినిపించడంతో భయపడిన కార్మికులు ఇరుకైన వంతెనపై పరుగులు తీస్తుండగా, భారీ ఒత్తిడిని తట్టుకోలేక వంతెన ఒక్కసారిగా కుప్పకూలింది. సెకన్ల వ్యవధిలోనే వంతెన కింద పడిపోవడంతో పలువురు అక్కడికక్కడే మరణించగా, మరికొందరు తీవ్రమైన గాయాలతో చిక్కుకున్నారని తెలిసింది.
ఈ ఘటనకు సంబంధించిన దృశ్యాలు సోషల్ మీడియాలో తీవ్ర వైరల్ అవుతున్నాయి.
లక్షలాది మందికి ఉపాధి కల్పిస్తున్న ఈ ముఖ్యమైన మైనింగ్‌ ప్రాంతంలో భద్రతా ప్రమాణాలు సరిగా పాటించకపోవడంపై ఇప్పటికే అనేక అనుమానాలు వ్యక్తమవుతున్నాయి. గతంలోనూ ఇలాంటి సంఘటనలు చోటుచేసుకున్న నేపథ్యంలో, ఈ ప్రమాదంపై అధికారుల నిర్లక్ష్యం మరోసారి తీవ్ర విమర్శలకు గురవుతోంది.
