ప్రధాని మోదీకి క్షమాపణలు చెప్పండి.. మాల్దీవుల అధ్యక్షుడిపై విపక్షాల ఒత్తిడి
మాల్దీవుల అధ్యక్షుడు మహమ్మద్ ముయిజ్జూ ప్రధానమంత్రి నరేంద్ర మోదీకి మరియు భారత ప్రజలకు అధికారికంగా క్షమాపణలు చెప్పాలని కోరారు మాల్దీవుల జుమ్‌హూరీ పార్టీ (జేపీ) నాయకుడు ఖాసిం ఇబ్రహీం. మాల్దీవుల పార్లమెంటులో మెజారిటీని కలిగి ఉన్న ప్రధాన ప్రతిపక్షం MDP, అధ్యక్షుడిని అభిశంసించే తీర్మానాన్ని ప్రవేశపెట్టాలని చూస్తోంది. ప్రభుత్వ అనుకూల ఎంపీలు, ప్రతిపక్ష శాసనసభ్యుల మధ్య సభలో చెలరేగిన ఘర్షణల తరువాత ఈ పరిణామం చోటుచేసుకొంది. “ఏ దేశానికి సంబంధించి, ముఖ్యంగా పొరుగు దేశానికి సంబంధించి, మనం సంబంధాన్ని ప్రభావితం చేసే విధంగా మాట్లాడకూడదు. మన పట్ల మనకు ఒక బాధ్యత ఉంది, దానిని పరిగణనలోకి తీసుకోవాలి. అధ్యక్షుడు సోలిహ్ ఈ బాధ్యతను పరిగణనలోకి తీసుకున్నారు.” అని చెప్పాడు.
గత ఏడాది ప్రారంభంలో, అప్పటి మాల్దీవుల అధ్యక్షుడు ఇబ్రహీం సోలిహ్ ప్రతిపక్షాల ‘ఇండియా అవుట్’ ప్రచారం “జాతీయ భద్రతకు ముప్పు” అని పేర్కొంటూ డిక్రీపై సంతకం చేశారు. ఇది ప్రచార బ్యానర్‌లను తీసివేయడానికి భద్రతా ఏజెన్సీలను అనుమతిస్తుంది. ప్రతిపక్ష పార్టీలపై చర్య తీసుకోవడానికి రాజ్యాంగపరమైన కవర్‌ను అందిస్తుంది. ప్రోగ్రెసివ్ పార్టీ ఆఫ్ మాల్దీవ్స్ (PPM) మాజీ అధ్యక్షుడు అబ్దుల్లా యమీన్ నేతృత్వంలోని ప్రతిపక్షం, హిందూ మహాసముద్ర ద్వీప దేశంలో ఉన్న భారత సైనికాధికారులు నిబంధనలను ఉల్లంఘించారని నిరూపించబడని వాదనను ప్రచారం చేస్తూ గత ఏడాది కాలంగా ‘ఇండియా అవుట్’ ప్రచారానికి నాయకత్వం వహిస్తున్నారు. మాల్దీవుల సార్వభౌమాధికారం ముఖ్యమని నినదిస్తున్నారు.