మరో అల్పపీడనం… ఈ నెల 18 నుంచి ఏపీలో మళ్లీ వర్షాలే..

మరోసారి ఏపీ రాష్ట్రాన్ని వానలు ముంచెత్తనున్నాయి. గత కొద్దిరోజులుగా రాయలసీమ, దక్షిణ కోస్తాంధ్ర ప్రాంతాల్లో వర్షం కురిసింది. రాబోయే రెండు రోజుల్లో ఆగ్నేయ బంగాళాఖాతంలో ఏర్పడే మరో అల్పపీడన ప్రభావం కారణంగా ఏపీలో మళ్లీ వర్షాలు కురిసే అవకాశం ఉందని వాతావరణ శాఖ తెలిపింది. అలాగే ఈ నెల 16 తేదీన ఆగ్నేయ బంగాళాఖాతంలో మరో అల్పపీడనం ఏర్పడనుందని తెలిపింది. దీని ప్రభావంతో 18 నుంచి రాష్ట్రంలో వర్షాలు కురవనున్నాయని వాతావరణ శాఖ పేర్కొంది.

రానున్న 2 రోజుల్లో దక్షిణ కోస్తాంధ్ర, రాయలసీమల్లో తేలికపాటి నుంచి మోస్తరు వర్షాలు కురుస్తాయని.. మరికొన్ని ప్రాంతాల్లో భారీ వర్షాలు కురిసే అవకాశం ఉందని వాతావరణ శాఖ స్పష్టం చేసింది. ఇప్పటికే నెల్లూరు జిల్లా వ్యాప్తంగా భారీ వర్షాలు కురుస్తున్నాయి. నగరంలోని లోతట్టు ప్రాంతాలు నీట మునిగాయి. జనం తీవ్ర ఇబ్బందులు పడుతున్నారు. భారీ వర్షాలతో వాహనాలు నీట మునిగాయి. కావలిలో కూడా కుండపోత వర్షం కురిసింది.  ఉదయగిరి, కావలి, గూడూరులో కూడా భారీ వర్షాలు పడుతున్నాయి.