ప్రధాని మోడీకి కాంగ్రెస్ అగ్రనేత సోనియా గాంధీ లేఖ

పార్లమెంట్ అత్యవసర సమావేశాల నేపథ్యంలో ప్రధాని నరేంద్ర మోడీకి కాంగ్రెస్ అగ్రనేత సోనియా గాంధీ లేఖ రాశారు. దేశంలోని ఇతర రాజకీయ పార్టీలతో ఎలాంటి సంప్రదింపులు లేకుండానే ఈ ప్రత్యేక సమావేశాన్ని ఏర్పాటు చేశారని ప్రధాని మోడీకి రాసిన లేఖలో సోనియా ప్రస్తావించారు. విపక్షాలు ఎవరికి కూడా పార్లమెంట్ సమావేశాల ఎజెండా గురించి ఎటువంటి సమాచారం లేదని… కేవలం ఐదు రోజులు ప్రభుత్వ కార్యకలాపాల కోసం కేటాయించబడిందని మాత్రమే తెలుసునన్నారు. బుధవారం ప్రధాని నరేంద్ర మోదీకి రాసిన లేఖలో, కాంగ్రెస్ అధినేత్రి సోనియా గాంధీ రాబోయే ఐదు రోజుల పార్లమెంట్ ప్రత్యేక సమావేశాల్లో మణిపూర్, కేంద్ర-రాష్ట్ర సంబంధాలలో హింసతో సహా పలు అంశాలపై చర్చను కోరారు. సోనియా లేఖలో పేర్కొన్న అంశాల్లో ద్రవ్యోల్బణం, నిరుద్యోగం, మతపరమైన ఉద్రిక్తతలు, చైనా సరిహద్దు ఉల్లంఘన కేసుల పెరుగుదల కూడా ఉన్నాయి. “నిర్మాణాత్మక సహకార స్ఫూర్తితో, ఈ సమస్యలు రాబోయే ప్రత్యేక సెషన్‌లో చర్చించాలని తాను ఆశిస్తున్నట్టుగా సోనియా లేఖలో కోరారు.

సోనియా లేఖకు సంబంధించి కాంగ్రెస్ ప్రధాన కార్యదర్శి జైరాం రమేష్ మాట్లాడుతూ, సభా కార్యకలాపాలలో ఎటువంటి అజెండాను చర్చించకపోవడం లేదా జాబితా చేయకపోవడం ఇదే మొదటిసారని విమర్శించారు. “రాబోయే సెషన్ నిర్మాణాత్మకంగా ఉండాలని కాంగ్రెస్ కోరుకుంటుందని, స్ట్రాటజీ గ్రూప్ సమావేశంలో, ఇండియా కూటమి సమావేశంలో నిర్ణయించామని చెప్పారు. ప్రధాని తీవ్ర భయాందోళనలో, అలసిపోయారని రమేష్ ఆరోపించారు. సెప్టెంబర్ 18 నుంచి 22 వరకు పార్లమెంట్ ప్రత్యేక సమావేశాలు జరగనున్నాయి.