మాజీ మంత్రి అమర్నాథ్కు మహిళా కమిషన్ నోటీసులు!
ఆంధ్రప్రదేశ్ మాజీ మంత్రి, వైఎస్సార్ కాంగ్రెస్ పార్టీ నాయకుడు గుడివాడ అమర్నాథ్కు గట్టి షాక్ తగిలింది. రాష్ట్ర హోంమంత్రి వంగలపూడి అనితను ఉద్దేశించి ఆయన చేసిన వివాదాస్పద వ్యాఖ్యలపై రాష్ట్ర మహిళా కమిషన్ తీవ్రంగా స్పందించింది. ఇటీవల విశాఖపట్నంలో జరిగిన ఒక సమావేశంలో హోంమంత్రి అనితను ‘మేకప్ మంత్రి’ అంటూ అమర్నాథ్ విమర్శించారు. ఈ వ్యాఖ్యలను సుమోటోగా స్వీకరించిన మహిళా కమిషన్, ఆయనకు నోటీసులు జారీ చేసింది. మహిళలను కించపరిచేలా మాట్లాడటం సరికాదని మండిపడిన కమిషన్, వెంటనే దీనిపై వివరణ ఇవ్వడంతో పాటు వ్యక్తిగతంగా విచారణకు హాజరుకావాలని ఆదేశించింది.
రాజకీయాల్లో మహిళా ప్రతినిధులపై ఇలాంటి వ్యక్తిగత విమర్శలు చేయడం తగదని, ఇవి సమాజంలో తప్పుడు సంకేతాలకు దారితీస్తాయని మహిళా కమిషన్ స్పష్టం చేసింది. విచారణకు హాజరుకాకపోతే చట్టపరమైన కఠిన చర్యలు తప్పవని హెచ్చరించింది. అమర్నాథ్ చేసిన వ్యాఖ్యలపై ఇప్పటికే అధికార కూటమి నాయకులు, పలు మహిళా సంఘాలు తీవ్ర ఆగ్రహం వ్యక్తం చేశాయి. ఆయన వెంటనే హోంమంత్రికి బహిరంగ క్షమాపణలు చెప్పాలని డిమాండ్ చేశాయి.
అయితే ఈ వివాదంపై మాజీ మంత్రి అమర్నాథ్ మాత్రం ఎక్కడా వెనక్కి తగ్గడం లేదు. తనపై ఎన్ని కేసులు పెట్టినా తాను చేసిన విమర్శలను వెనక్కి తీసుకునే ప్రసక్తే లేదని ఆయన తేల్చి చెప్పారు. గతంలో హోంమంత్రి అనిత తమ పార్టీ అధినేతను, తమను తీవ్రంగా కించపరుస్తూ మాట్లాడారని, అప్పుడు లేని నిబంధనలు ఇప్పుడే ఎందుకు వస్తున్నాయని ఆయన ప్రశ్నించారు. కేవలం తమ పార్టీ కార్యకర్తల్లో భరోసా నింపడానికే తాను ఆ వ్యాఖ్యలు చేశానని సమర్థించుకున్నారు. అమర్నాథ్ తన వ్యాఖ్యలకు కట్టుబడి ఉండటంతో ఈ వ్యవహారాన్ని మహిళా కమిషన్ మరింత సీరియస్గా తీసుకుంది. ఈ రాజకీయ దుమారం రాష్ట్రంలో ఇప్పుడు తీవ్ర చర్చనీయాంశంగా మారింది.
