ఆధునిక ప్రేమకు.. పురాతన శాస్త్రాలకు మధ్య..
ఆధునిక ప్రేమకు.. పురాతన శాస్త్రాలకు మధ్య ఒక అద్భుత ప్రయాణం.. ‘ఓహ్’ సినిమా. ఏకరి సత్యనారాయణ దర్శకత్వంలో రఘు రామ్ – శృతిశెట్టి, నైనా పాఠక్ హీరో హీరోయిన్స్ గా నటించిన ఈ చిత్రం ఒక విభిన్నమైన కాన్సెప్ట్తో ప్రేక్షకుల ముందుకు వచ్చింది. కేవలం ఒక ప్రేమకథగానే కాకుండా, భారతీయ పురాణాలు ప్రాచీన విజ్ఞానాన్ని జోడించి తీసిన ఈ చిత్రం ప్రేక్షకులకు ఓ కొత్త అనుభూతిని అందిస్తుంది.
కథ : కృష్ణ (రఘురామ్), కావ్య (శృతి శెట్టి) అనే అమ్మాయిని ఎంతో గాఢంగా ప్రేమిస్తాడు. అయితే, అతనికి ఉన్న ‘క్రోమోఫోబియా’ అనే వింత సమస్య కారణంగా దృశ్య (నైనా పాఠక్ ) అనే మరో అమ్మాయితో ఉన్న బంధాన్ని గుర్తుంచుకోలేకపోతాడు. ఒకవైపు జ్ఞాపకాలు లేని గతం.. మరోవైపు ప్రాణప్రదమైన ప్రస్తుత ప్రేమ.. ఈ రెండింటి మధ్య కృష్ణ పడే సంఘర్షణే ఈ చిత్ర ప్రధాన ఇతివృత్తం. మన భారతీయ గ్రంథాలలోని అంశాలను ఉపయోగించి అతను ఈ సమస్యను ఎలా అధిగమించాడు? అనేది ఆసక్తికరమైన కథాంశం.
విశ్లేషణ: ప్రధానంగా కృష్ణ, రాజు, కావ్య, దృశ్య నలుగురు ఫ్రెండ్స్ మధ్య కథ సాగుతుంది. రఘు రామ్ కృష్ణ పాత్రలో ఎంతో చక్కగా ఒదిగిపోయారు. గందరగోళానికి గురయ్యే యువకుడిగా, ప్రేమికుడిగా తన నటనతో ప్రేక్షకులను మెప్పించాడు. శృతి శెట్టి – నైనా పాఠక్ హీరోయిన్లు ఇద్దరూ తమ పాత్రల పరిధి మేరకు నటించి ప్రశంసలందుకున్నారు. ముఖ్యంగా సెంటిమెంట్, రొమాంటిక్ సన్నివేశాల్లో వీరి నటన అందర్నీ విశేషంగా ఆకట్టుకుంటుంది. క్రోమోఫోబియా వంటి కొత్త పాయింట్ను టచ్ చేయడమనేది గొప్పగా చెప్పొచ్చు. భారతీయ గ్రంథాలలోని గొప్పతనాన్ని కథలో భాగంగా చూపించడం మెచ్చుకోవాలి. ప్రేమ, భావోద్వేగాల మధ్య ఉన్న బ్యాలెన్స్ ఆకట్టుకునేలా చేసింది. అయితే.. కథలోని సస్పెన్స్ను మరికొంత కొనసాగించి ఉంటే మరింత బాగుండేదనిపించింది. ముఖ్యంగా కథానాయకుడికి ఉన్న ఫోబియా (భయం) గురించి అంత త్వరగా రివీల్ చేయకుండా ఉండాల్సింది. అలాగే, ఫైట్ సీక్వెన్స్లు ఆశించిన స్థాయిలో లేవనిపిస్తోంది. మొత్తానికి ‘ఓహ్’ చిత్రం కేవలం యువతకే కాకుండా, మన సంస్కృతిని, విజ్ఞానాన్ని ఇష్టపడే ప్రతి ఒక్కరూ చూడదగ్గ సినిమా. వినూత్నమైన కథాంశంతో వస్తున్న ఈ చిత్రం ప్రేక్షకులకు ఒక కొత్త ఫీల్ని అందిస్తుందనడంలో సందేహం లేదు. కుటుంబం అంతా కలిసి చూడదగ్గ ఒక చక్కని రొమాంటిక్ డ్రామా ఇది.
సాంకేతిక విభాగం: దర్శకుడు ఏకరి సత్యనారాయణ ఎంచుకున్న పాయింట్ వైవిధ్యంగా ఉంది. రఘురామ్ బడుగు రాసిన కథ ఆధునిక కాలంలో వస్తున్న రొటీన్ ప్రేమకథలకు భిన్నంగా ఉంది. సైన్స్ను – మన ప్రాచీన విజ్ఞానాన్ని మేళవించి కథను నడిపించిన తీరు అభినందనీయం. కథ బ్యాక్ గ్రౌండ్ మనాలిలో జరగడం సినిమాకు మారింత అందాన్ని తీసుకువచ్చింది. మంచుతో కప్పిన పర్వతాలు, లోయలు, నదులు, దట్టమైన అడవుల దృశ్యాలు ప్రేక్షకులను మైమరపింపజేస్తాయి. నవనీత్ చారి అందించిన సంగీతం సినిమా మూడ్ను బాగా ఎలివేట్ చేసింది. భాష శ్రీ రాసిన పాటలు, నేపథ్య సంగీతం సినిమాకు ప్రాణం పోశాయి. ఏకరి ఫిల్మ్స్ బ్యానర్పై రాజీ పడకుండా ఈ చిత్రాన్ని క్వాలిటీగా నిర్మించారు. విజువల్స్ రిచ్గా ఉండి సినిమా స్థాయిని పెంచాయి.