తెలంగాణ కీలక రహదారులకు గ్లోబల్ పేర్లు
హైదరాబాద్ : తెలంగాణలోని ప్రముఖ రహదారులకు ప్రపంచస్థాయి గుర్తింపు కలిగే పేర్లు ఇవ్వాలని రాష్ట్ర ప్రభుత్వం నిర్ణయించింది. ఇన్నోవేషన్, అంతర్జాతీయ భాగస్వామ్యాలు, గ్లోబల్ బ్రాండ్ విలువను పెంచే దిశగా ఈ నిర్ణయం తీసుకున్నట్లు సోమవారం జరిగిన తెలంగాణ రైజింగ్ గ్లోబల్ సమ్మిట్లో ముఖ్యమంత్రి రేవంత్ రెడ్డి వెల్లడించారు. హైదరాబాద్ ఫైనాన్షియల్ డిస్ట్రిక్ట్లో అమెరికా వెలుపల గూగుల్ సంస్థ నిర్మిస్తున్న అతి పెద్ద క్యాంపస్కు అనుసంధానమైన రహదారిని **‘గూగుల్ స్ట్రీట్’**గా నామకరణం చేయాలని ప్రభుత్వం తేల్చింది.
అంతేకాక, అంతర్జాతీయ గుర్తింపు కోసం ‘డొనాల్డ్ ట్రంప్ అవెన్యూ’, ‘రతన్ టాటా రోడ్’ వంటి పేర్లను కూడా ముఖ్యమంత్రి ప్రతిపాదించారు. దివంగత రతన్ టాటా గారి సేవలను స్మరించుకుంటూ, రావిర్యాల వద్ద నెహ్రూ ఔటర్ రింగ్ రోడ్డును కలుపుతున్న గ్రీన్ ఫీల్డ్ రేడియల్ రోడ్డుకు ఆయన పేరు ఇవ్వాలని నిర్ణయించారు. హైదరాబాదు అమెరికా కాన్సులేట్ జనరల్ కార్యాలయం ఉన్న రహదారికి ‘డొనాల్డ్ ట్రంప్ అవెన్యూ’ అనే పేరు పెట్టాలని ప్రభుత్వం నిర్ణయించినట్లు సమాచారం. ఈ ప్రతిపాదనలను అమలు చేసేందుకు త్వరలోనే కేంద్ర విదేశాంగ మంత్రిత్వ శాఖకు, అమెరికా రాయబార కార్యాలయానికి తెలంగాణ ప్రభుత్వం అధికారిక లేఖలు పంపనుంది.
