మొదలైన పెళ్లిళ్ల సీజన్… 40 రోజుల్లో 32 లక్షల వివాహాలు
పెళ్లి చేసుకునే వారికి గుడ్న్యూస్. మంచి ముహూర్తాలు లేకపోవడంతో 3 నెలల నుంచి పెళ్ళి వేడుకలు ఆగిపోయాయి. అయితే.. ఈ నెల 4 నుంచి శుభ ముహుర్తాలు ప్రారంభమయ్యాయి. ఈ నెల 4న మొదలైన పెళ్లిళ్ళ సీజన్ వచ్చే నెల 14 వరకు కొనసాగుతుంది. అయితే.. ఈ సీజన్లో మొత్తంగా 32 లక్షల వివాహాలు జరిగే అవకాశం ఉందని కాన్ఫెడరేషన్ ఆఫ్ ఆల్ ఇండియా ట్రేడర్స్ తెలిపింది. ఈ సందర్భంగా 3.75 లక్షల కోట్ల వ్యాపారం జరిగి అవకాశం ఉందని పేర్కొంది. దేశ వ్యాప్తంగా 35 నగరాల్లోని 4,302 మంది వ్యాపారులు, సర్వీస్ ప్రొవైడర్ల నుంచి ఈ వివరాలను సేకరించింది. ఈ సీజన్లో ఒక్క ఢిల్లీలోనే 3.5 లక్షల వివాహాలు జరగనున్నట్టు సీఏఐటీ సెక్రటరీ జనరల్ ప్రవీణ్ ఖండేల్వాల్ తెలిపారు. ఈ వివాహాల ద్వారా రూ. 75 వేల కోట్ల వ్యాపారం జరిగే అవకాశం ఉందని ఆయన అంచనా వేశారు. గతేడాది ఇదే సీజన్లో దేశంలో 25 లక్షల వివాహాలు జరిగాయని, వాటి ద్వారా రూ. 3 లక్షల కోట్ల మేర వ్యాపారం జరిగిందన్నారు.