బైకర్‌ మెడకు చుట్టుకున్న తాడు.. గాల్లో ఎగిరిపడిన యువకుడు
బైక్‌పై వెళ్తున్న వ్యక్తి మెడకు లోడ్‌ లారీ నుంచి వేలాడుతున్న తాడు చుట్టుకుంది. దీంతో అతడు బైక్‌పై నుంచి గాల్లోకి ఎగిరి రోడ్డుపై పడ్డాడు. అదృష్టవశాత్తు స్వల్ప గాయాలతో బయటపడ్డాడు. ఈ సంఘటన తమిళనాడులోని తూతుకుడి జిల్లాలో చోటు చేసుకుంది. శ్రీవైకుంఠం పట్టణానికి చెందిన ముత్తు అనే వ్యక్తి తన బైక్‌పై పనికి వెళ్తున్నాడు. ఉరల్‌ ప్రాంతం వద్ద ఎరువుల లోడ్‌తో వెళ్తున్న లారీ నుంచి ఒక ఎరువుల బస్తా రోడ్డుపై పడింది. ఆ బస్తాకు చుట్టుకుని లారీ నుంచి వేలాడిన తాడై బైక్‌పై వెళ్తున్న ముత్తు మెడకు చుట్టుకుంది. దీంతో అతడు బైక్‌పై నుండి గాల్లోకి ఎగిరి రోడ్డుపై పడ్డాడు. ఈ ప్రమాదంలో ముత్తుకు స్వల్ప గాయాలయ్యాయి. స్థానికులు గమనించి వెంటనే ఆస్పత్రికి తరలించారు. ప్రస్తుతం ఈ వీడియో సోషల్‌ మీడియాలో వైరల్‌గా మారింది.
